تلنگانہ کے کریم نگر ضلع کے ماناکنڈورعلاقہ میں انسانی آبادی میں ریچھ کی موجودگی سے سنسنی

حیدرآباد: تلنگانہ کے کریم نگر ضلع کے ماناکنڈورعلاقہ میں ایک ریچھ انسانی آبادی میں آگیا جس سے سنسنی پھیل گئی۔

یہ واقعہ منگل کی صبح کی اولین ساعتوں میں پیش آیا۔اس جنگلی جانور کو درخت پر دیکھ کر مقامی افراد میں تشویش کی لہردوڑگئی جن کا کہنا ہے کہ یہ ریچھ قریبی پہاڑیوں سے انسانی آبادی میں آگیا اور صبح تقریبا چاربجے مقامی مندرکے قریب واقع ایک مکان میں داخل ہونے کی کوشش کی۔

تاہم آوارہ کتوں نے اس کا تعاقب کیا جس پر وہ وہاں سے بھاگ گیا اور قریب میں واقع کریم نگر۔ورنگل قومی شاہراہ پر ایک درخت پر چڑھ گیا۔

اس کو دیکھنے کے لئے عوام کی بڑی تعداد وہاں جمع ہوگئی۔مقامی افراد نے محکمہ جنگلات کے عہدیداروں کو اس سلسلہ میں چوکس کیا جو وہاں پہنچ گئے۔