تلگو ریاستوں میں شدید سردی۔ حیدرآباد میں کہرکی چادر

حیدرآباد: تلگو ریاستوں تلنگانہ اور آندھرا پردیش میں سردی کی لہر شدت اختیار کرتی جا رہی ہے جس کی وجہ سے عوام میں تشویش پائی جا رہی ہے۔ سردی کا یہ اثر نہ صرف دیہی اضلاع بلکہ دارالحکومت حیدرآباد میں بھی نمایاں طور پر دیکھا جا رہا ہے۔

شہر میں گزشتہ کئی سالوں کے مقابلہ میں اس مرتبہ ریکارڈ توڑ سردی ہورہی ہے۔خاص طور پر حیدرآباد کے مضافاتی علاقوں میں روزانہ صبح کے وقت گھنی کہرچھائی رہتی ہے۔ اس خطرناک کہر کی وجہ سے آؤٹر رنگ روڈ اور دیگر شاہراہوں پرروشنی انتہائی کم ہو گئی ہے جس کے باعث حکام نے گاڑی چلانے والوں کو محتاط رہنے کی ہدایت کی ہے۔

کئی مقامات پر صبح 9 بجے کے بعد بھی صورتحال ایسی رہتی ہے کہ سڑک پر آگے چلنے والی گاڑیاں نظر نہیں آتیں۔

محکمہ موسمیات کے حکام کے مطابق آنے والے دو سے تین دنوں میں سردی کی شدت میں مزید اضافہ کا امکان ہے۔ شہریوں کو مشورہ دیا گیا ہے کہ وہ سردی سے بچاؤ کے لیے ضروری اقدامات کریں، خاص طور پر ضعیف افراداور بچوں کا خیال رکھیں۔