سردی کی شدید لہر نے تلنگانہ کو اپنی لپیٹ میں لے لیا؛ محکمۂ موسمیات کی یلو الرٹ جاری

تلنگانہ بھر میں سردی کی لہر مزید شدید ہوگئی ہے۔ ہڈیوں میں اُتر جانے والی ٹھنڈی ہوائیں اور صبح کے وقت گھنا کوہرا عوام کے لیے پریشانی کا باعث بن رہا ہے۔ محکمۂ موسمیات نے پیش گوئی کی ہے کہ آئندہ دو دنوں میں کم سے کم درجۂ حرارت معمول سے 4 سے 5 ڈگری کم رہ سکتا ہے۔

محکمۂ موسمیات نے پیر کے دن عادل آباد، کومرم بھیما آصف آباد، نرمّل، سنگاریڈی، میدک اور کاماریڈی اضلاع کے لیے یلو الرٹ جاری کیا ہے، جبکہ منگل کے دن آصف آباد، عادل آباد، نرمّل، سنگاریڈی اور میدک اضلاع کو یلو الرٹ کے دائرے میں رکھا گیا ہے۔

آصف آباد ضلع کے سرپور میں ریاست کا سب سے کم درجۂ حرارت 7.4 ڈگری سیلسیس ریکارڈ کیا گیا، جبکہ کئی مقامات پر درجۂ حرارت سنگل ڈجٹ میں پہنچ گیا ہے۔ حیدرآباد میں اس موسم کا سب سے کم درجۂ حرارت یونیورسٹی آف حیدرآباد کے علاقے میں 8.8 ڈگری سیلسیس ریکارڈ کیا گیا۔ راجندر نگر میں 10 ڈگری، کینٹونمنٹ میں 11.2 ڈگری، مریدپلی میں 11.5 ڈگری جبکہ قطب اللہ پور اور گچی باؤلی میں 12 ڈگری سیلسیس درجۂ حرارت درج کیا گیا۔

محکمۂ موسمیات کے مطابق سردی کی یہ شدید لہر آئندہ دو دنوں تک برقرار رہے گی، جبکہ حیدرآباد میں بھی منگل کی صبح تک ٹھنڈی ہواؤں کا سلسلہ جاری رہنے کی توقع ہے۔