شاہ باد پوکسو کیس کے ملزم راج کمارکی خودکشی ، افراد خاندان نے لاش لینے سے انکار کر دیا

حیدرآباد: شباد پوکسو کیس کے ملزم اور مبینہ طور پر چھ قتل کے مقدمات میں مطلوب راج کمار نے رنگا ریڈی ضلع کے کوتھور منڈل کے پنجرہ گاؤں کے قریب ایک کنویں میں چھلانگ لگا کر خودکشی کر لی۔

پولیس کے مطابق راج کمار کی لاش کنویں سے برآمد کر کے پوسٹ مارٹم کے لیے منتقل کی گئی تھی، جہاں قانونی کارروائی مکمل کر لی گئی۔ راج کمار پر شباد کے سنسنی خیز قتل اور پوکسو کیس سمیت متعدد سنگین جرائم میں ملوث ہونے کے الزامات تھے، جس نے ریاست بھر میں شدید تشویش پیدا کر دی تھی۔

اس معاملے میں ایک اہم پیش رفت اس وقت سامنے آئی جب راج کمار کے اہلِ خانہ نے اس کی لاش وصول کرنے سے انکار کر دیا۔ ذرائع کے مطابق خاندان کے افراد نے پولیس کو تحریری طور پر آگاہ کیا کہ ان کا راج کمار سے کسی قسم کا تعلق نہیں ہے اور وہ اس کی میت اپنے حوالے نہیں لینا چاہتے۔

اہلِ خانہ کی جانب سے لاش لینے سے انکار کے بعد پولیس نے قانونی تقاضوں کے مطابق چیوڑلہ میں راج کمار کی آخری رسومات کے انتظامات شروع کر دیے ہیں۔

پولیس حکام نے واقعہ کی مزید تحقیقات شروع کر دی ہیں تاکہ خودکشی کے محرکات اور اس سے متعلق دیگر پہلوؤں کا جائزہ لیا جا سکے۔