مائیکروویو میں کھانا پکاتے وقت ڈھکن لگانا چاہیے یا نہیں؟ جانئیے حیران کن انکشاف
ماہرین یہ بھی بتاتے ہیں کہ مائیکروویو میں بعض اوقات حرارت یکساں نہیں ہوتی، جس کی وجہ سے بیکٹیریا مکمل طور پر ختم نہیں ہوتے۔ لیکن اگر ڈھکن لگا کر پکایا جائے تو بھاپ کی وجہ سے حرارت بہتر طریقے سے پھیلتی ہے اور کھانا زیادہ محفوظ طریقے سے تیار ہوتا ہے۔ اس کے علاوہ سبزیوں کا رنگ، ذائقہ اور تازگی بھی برقرار رہتی ہے۔
آج کے دور میں مائیکروویو کا استعمال گھروں میں عام ہو چکا ہے اور لوگ آسانی سے اس میں کھانا گرم یا تیار کر لیتے ہیں۔ عام طور پر کھانا مائیکروویو میں رکھ کر بٹن دبانے سے ہی کام مکمل ہو جاتا ہے، لیکن بہت سے لوگوں کے ذہن میں یہ سوال رہتا ہے کہ مائیکروویو میں کھانا پکاتے وقت برتن پر ڈھکن لگانا چاہیے یا نہیں۔ ماہرین کے مطابق یہ ایک چھوٹا سا سوال ضرور ہے مگر اس کا تعلق کھانے کی غذائیت، معیار اور حفاظت سے ہے۔
ماہرین کا کہنا ہے کہ مائیکروویو میں کھانا پکانے کا طریقہ عام چولہے سے مختلف ہوتا ہے۔ اس میں مائیکروویو لہریں کھانے میں موجود پانی کے مالیکیولز کو تیزی سے حرکت دیتی ہیں جس سے حرارت پیدا ہوتی ہے اور کھانا اندر سے پکنے لگتا ہے۔ اسی وجہ سے کھانے میں نمی (Moisture) کا برقرار رہنا بہت ضروری ہوتا ہے۔
اگر مائیکروویو میں کھانے کو ڈھکن لگا کر پکایا جائے تو بھاپ برتن کے اندر ہی رہتی ہے جس سے کھانا یکساں طور پر گرم ہوتا ہے اور اس کی نمی برقرار رہتی ہے۔ اس طریقے سے کھانا جلدی پک جاتا ہے اور وٹامن سی اور فولِیٹ جیسے اہم غذائی اجزا بھی زیادہ حد تک محفوظ رہتے ہیں۔ اس کے برعکس اگر بغیر ڈھکن کے کھانا پکایا جائے تو بھاپ باہر نکل جاتی ہے جس سے کھانے کی اوپری سطح خشک ہو سکتی ہے اور بعض حصوں میں زیادہ جبکہ بعض میں کم حرارت پیدا ہوتی ہے، جس سے غذائیت میں کمی کا خدشہ بڑھ جاتا ہے۔
ماہرین یہ بھی بتاتے ہیں کہ مائیکروویو میں بعض اوقات حرارت یکساں نہیں ہوتی، جس کی وجہ سے بیکٹیریا مکمل طور پر ختم نہیں ہوتے۔ لیکن اگر ڈھکن لگا کر پکایا جائے تو بھاپ کی وجہ سے حرارت بہتر طریقے سے پھیلتی ہے اور کھانا زیادہ محفوظ طریقے سے تیار ہوتا ہے۔ اس کے علاوہ سبزیوں کا رنگ، ذائقہ اور تازگی بھی برقرار رہتی ہے۔
البتہ ماہرین خبردار کرتے ہیں کہ مائیکروویو میں برتن کو مکمل طور پر بند ڈھکن سے نہ ڈھانپا جائے۔ بہتر یہ ہے کہ وینٹیلیشن والا ڈھکن استعمال کیا جائے یا کھانے کو ہلکے انداز میں ڈھانپ دیا جائے تاکہ بھاپ باہر نکلنے کا راستہ بھی موجود رہے۔ اسی طرح پلاسٹک کے بجائے شیشے، سیرامک یا مائیکروویو سیف کور استعمال کرنا زیادہ محفوظ سمجھا جاتا ہے۔
ماہرین کے مطابق مائیکروویو میں کھانا پکاتے وقت اس طرح کی چھوٹی احتیاطی تدابیر اختیار کرنے سے نہ صرف کھانے کی غذائیت محفوظ رہتی ہے بلکہ صحت پر بھی مثبت اثرات مرتب ہوتے ہیں۔
