شبھمن گل نے ریکارڈ 269 رن بنائے

برمنگھم: کپتان شبھمن گل کی (269) کی ریکارڈ ساز ڈبل سنچری والی اننگز کی بدولت ہندوستان نے انگلینڈ کے خلاف دوسرے ٹیسٹ کے دوسرے دن جمعرات کے روز 587 رنز کا بڑا اسکور بنا لیا۔ جواب میں انگلینڈ نے کھیل کے اختتام تک تین وکٹوں کے نقصان پر 77 رنز بنائے۔

دوسرا دن مکمل طور پر گل اور انڈیا کے نام تھا۔ 587 رنز بنانے کے بعد ہندوستان نے انگلینڈ کی تین اہم وکٹیں بھی حاصل کیں۔ تاہم دن کا کھیل ختم ہونے تک ہیری بروک اور جو روٹ کے درمیان نصف سنچری کی شراکت مکمل ہوئی۔

تیسرے دن کے کھیل کا انحصار ہندوستانی گیند بازوں پر ہوگا جب کہ انگلینڈ کی ٹیم کی امیدیں بروک اور روٹ پر منحصر ہوں گی۔ اسٹمپ کے وقت روٹ 18 اور بروک 30 رنز پر ناٹ آؤٹ تھے۔

آکاش دیپ نے آج اپنے دوسرے اوور میں پہلے بین ڈکٹ اور پھر اولی پوپ کو لگاتار دو گیندوں پر پویلین واپس بھیج دیا اور پھر سراج نے زیک کرولی کو پویلین واپس بھیج دیا۔ تینوں بلے باز کیچ آؤٹ ہوئے۔

تاہم آج کا دن ہندوستانی کپتان شبھمن گل کا تھا جنہوں نے 509 منٹ تک کریز پر رہتے ہوئے 387 گیندوں کا سامنا کیا اور 269 رنز کی اپنی ریکارڈ اننگز میں 30 چوکے اور تین چھکے لگائے۔ رویندر جڈیجہ نے 89 اور واشنگٹن سندر نے 42 رنز کا اسکور بنایا۔ گل نے جڈیجہ کے ساتھ 203 رنز کی زبردست شراکت داری کی اور پھر سندر کے ساتھ ساتویں وکٹ کے لیے 144 رنز جوڑے۔

چائے کے بعد جوش ٹونگ نے گل کو پوپ کے ہاتھوں آؤٹ کرایا۔ گل 574 کے ٹیم کے اسکور پر آؤٹ ہوئے۔ ہندوستان نے پھر 13 رنز جوڑ کر باقی دو وکٹیں گنوا دیں اور اس کی اننگز 587 رنز پر سمٹ گئی۔ انگلینڈ کی جانب سے شعیب بشیر نے 167 رنز کے عوض تین جبکہ کرس ووکس اور ٹونگ نے دو دو وکٹیں حاصل کیں۔