افغان شہریوں کو جاری ہزاروں پاکستانی پاسپورٹس کی تحقیقات میں سنسنی خیز انکشافات

کراچی: مبینہ کرپشن کے عوض افغان شہریوں کو جاری ہزاروں پاکستانی پاسپورٹس کی تحقیقات میں سنسنی خیز انکشافات ہوئے ہیں۔

تفصیلات کے مطابق ایف آئی اے کا کہنا ہے کہ افغان شہریوں کو کراچی کے صدر پاسپورٹ دفتر کے علاوہ عوامی مرکز، ملیر اور ٹھٹھہ دفتر سے بھی پاکستانی پاسپورٹ کا اجرا ہوا، غیر ملکیوں کو پاپسورٹ اجرا کے ذمہ داران کے خلاف محکمانہ اور ایف آئی اے تحقیقات جاری ہیں۔

کراچی میں صدر پاپسورٹ دفتر سے غیر ملکیوں کو جاری پاسپورٹس کی تعداد ایک ہزار کے قریب ہے، جب کہ غیر ملکیوں کو جاری اکثر پاسپورٹس سعودیہ میں مختلف مشنز سے جاری ہوئے۔

غیر ملکیوں کو 11 ہزار کے قریب جاری پاسپورٹس 2010 سے 2012 کی مدت میں جاری ہوئے، گم شدہ پاپسورٹس کی جگہ جاری پاسپورٹ میں جعل سازی کر کے بیرون ملک دوسرے افراد کو دیے گئے۔

ایف آئی اے سی ٹی ڈبلیو نے کراچی پاسپورٹ دفتر کے سپرنٹنڈنٹ اور سابق افسر کو گرفتار بھی کیا، جب کہ غیر ملکیوں کو پاسپورٹ اجرا معاملے میں نادرا کے کردار کا بھی جائزہ لیا جا رہا ہے۔