تلنگانہ میں میٹرو۔آر ٹی سی مشترکہ پاس کی قیمتوں میں بڑی کمی، دیوالی کا تحفہ

حیدرآباد: تلنگانہ کے وزیر ٹرانسپورٹ پونم پربھاکر نے مسافروں کو دیوالی کا تحفہ دیتے ہوئے میٹرو اور آر ٹی سی کے مشترکہ سفری پاس کی قیمتوں میں نمایاں کمی کا اعلان کیا ہے۔ نئی قیمتوں کا اطلاق 8 نومبر سے ہوگا۔

نئی قیمتوں کے مطابق یومیہ مشترکہ پاس کی فیس 400 روپے سے گھٹا کر 275 روپے کر دی گئی ہے، جس سے مسافروں کو روزانہ 125 روپے کی بچت ہوگی۔ اسی طرح ماہانہ پاس کی قیمت 8,500 روپے سے کم کرکے 4,000 روپے کر دی گئی ہے، جس سے ماہانہ 4,500 روپے کی بچت ہوگی۔

یومیہ پاس میں میٹرو سفر کے لیے 200 روپے اور آر ٹی سی بسوں کے لیے 75 روپے مختص کیے گئے ہیں۔ اس پاس کے ذریعے مسافر روزانہ چار یکطرفہ سفر کر سکیں گے۔

ماہانہ پاس میں میٹرو کے لیے 3,000 روپے اور آر ٹی سی کے لیے 1,000 روپے مختص ہوں گے۔ اس کے تحت ماہانہ 50 یکطرفہ میٹرو سفر اور آر ٹی سی بسوں میں لامحدود سفر کی سہولت حاصل ہوگی۔

وزیر ٹرانسپورٹ پونم پربھاکر نے کہا کہ حکومت کا مقصد مسافروں کے سفری اخراجات کم کرنا اور عوامی ٹرانسپورٹ کو زیادہ سستا اور قابل رسائی بنانا ہے۔

حکومت کو امید ہے کہ نئی قیمتوں سے حیدرآباد میں میٹرو اور آر ٹی سی دونوں خدمات استعمال کرنے والے روزانہ کے مسافروں کو بڑی راحت ملے گی۔