ایس ایس سی امتحانات‘ نقائص سے پاک انتظامات

حیدرآباد:تلنگانہ اسٹیٹ بورڈآف سکنڈری اسکول ایجوکیشن کی جانب سے ریاست میں ایس ایس سی امتحانات کے نقائص سے پاک انعقادکے لئے انتظامات کیئے جارہے ہیں۔ جاریہ سال 5.07 لاکھ طلباء نے امتحانات میں شرکت کے لئے فیس داخل کی ہے۔ بورڈ کی جانب سے ریاست بھر میں 2700 مراکز قائم کیئے جارہے ہیں۔

 ایس ایس سی بورڈ کے ذمہ داروں کے مطابق گزشتہ سال کے مقابلہ میں جاریہ سال 50 فیصداضافی امتحانی مراکز قائم کئے جارہے ہیں۔گزشتہ سال کے مقابلہ میں طلباء کی تعدادمیں 15,000 کا اضافہ ہواہے۔

ہرامتحانی مرکز میں کم ازکم 120 اور زیادہ سے زیادہ 280 طلباء امتحانات میں شرکت کریں گے۔ اگر اس سے زیادہ طلباء رہیں گے تواسی عمارت میں اضافی سہولتوں کی موجودگی کی صورت میں دوسرا امتحانی مرکز قائم کیاجائے گا۔

ایک امتحانی مرکز کوAاور دوسرے مرکزکوBقرار دیا جائے گا۔ہرامتحانی مرکز پر حفاظتی اقدامات کے تحت دوپولیس جوانوں کوتعینات کیا جائے گا۔دوسری طرف ایس ایس سی بورڈ کی جانب سے جرمانہ کے ساتھ فیس داخل کرنے کا ایک اور موقع فراہم کیاجارہاہے۔فروری کی 5تاریخ تک ایک ہزار روپے جرمانہ کے ساتھ تمام ریگولراور پرائیوٹ امیدوار فیس داخل کرسکتے ہیں۔