عراق میں سویڈن کا سفارت خانہ جلا دیا گیا

بغداد: عراق میں مظاہرین نے سویڈن کے سفارت خانے پر دھاوا بول کر اسے جلا دیا۔

تفصیلات کے مطابق سویڈن میں قرآن پاک کے نسخے کو نذر آتش کرنے کے خلاف عراق کے دارالحکومت بغداد میں جاری احتجاج کے دوران سینکڑوں مظاہرین نے سویڈش سفارتخانے پر دھاوا بول دیا اور اسے آگ لگا دی۔

سفارت خانے کے باہر مظاہرین نے ایک بار پھر علی الصبح جمع ہو کر سوئڈن کے خلاف شدید نعرے بازی کی۔ غیر ملکی میڈیا کے مطابق مذہبی رہنما مقتدیٰ الصدر کے حامی مظاہرین نے سفارت خانے کی عمارت میں داخل ہو کر توڑ پھوڑ کی اور اسے آگ لگا دی۔

عراق کی وزارت خارجہ نے سویڈن کا سفارت خانہ جلانے کی مذمت کی ہے اور کہا ہےکہ حکومت نے متعلقہ سکیورٹی حکام کو واقعے کی فوری تحقیقات کے ساتھ ضروری حفاظتی اقدامات کی ہدایت کی ہے۔

عراقی حکام کے مطابق واقعے میں سفارت خانے کا عملہ محفوظ ہے، آگ کو بجھا دیا گیا ہے اور صورت حال پر قابو پانے کے لیے پولیس کی بھاری نفری تعینات کی گئی ہے۔

دوسری جانب سویڈش وزارت خارجہ کا کہنا ہےکہ سفارت خانے اور سفارتی عملےکی حفاظت کی مکمل ذمہ داری عراقی حکومت پر عائد ہوتی ہے۔

خیال رہےکہ مذکورہ واقعہ سویڈن میں آج پھر ہونے والے توہین قرآن کے اعلان کے ردعمل میں کیا گیا ہے۔

سویڈن کے دارالحکومت اسٹاک ہوم میں دو افراد نے آج عراقی سفارت خانے کے باہر قرآن کی بے حرمتی اورعراقی پرچم جلانے کا اعلان کیا تھا جس کی اجازت دے دی گئی ہے۔

ان دو افراد میں سے ایک وہی شخص ہے جس نےگزشتہ ماہ عیدالاضحیٰ کے روز اسٹاک ہوم کی مسجد کے باہر قرآن کی بے حرمتی کی تھی۔