خالد منصور الدین الگیلانی کا قادری ولا حیدرآباد میں خطبہ

حیدرآباد: ملک عراق بغداد شریف کے نقیب الاشراف، الحاج سید خالد منصور الدین الگیلانی مدظلہ، جو بارگاہ پیران پیرؓ کے سجادہ نشین اور متولی ہیں، نے 17 ستمبر کی رات قادری ولا، قادری ہلز، جیلانی کالونی، حیدرآباد دکن میں ممتاز علماء کرام اور ارادت مندوں کے سامنے اہم خطاب کیا۔ انہوں نے عربی اور انگریزی میں اپنے خطاب میں مسلمانوں کو نصیحت کی کہ وہ اللہ کا ذکر، درود و سلام کی کثرت اور نماز پنجگانہ کی پابندی کریں۔

خالد منصور الدین الگیلانی نے فرمایا کہ ہمارے جد امجد، سلطان الاولیاء سیدنا شیخ عبدالقادر الگیلانی غوث الاعظمؓ ہمیشہ اپنے پیروکاروں کو ہدایت دیتے تھے کہ وہ اپنی زندگی میں اللہ جل مجدہ کے ذکر اور درود و سلام کی کثرت کریں، ایمان کو مضبوط رکھیں، اور اپنی نمازوں کی پابندی کریں۔

انہوں نے مسلمانوں پر زور دیا کہ وہ زکوة وقت پر ادا کریں، اگر استطاعت ہو تو حج کریں، رمضان کے روزے رکھیں، اور قرآن کی تلاوت کو اپنی عادت بنائیں۔ آپسی اتحاد و اتفاق کو فروغ دینے کے ساتھ ساتھ اپنی آخرت کی تیاری پر بھی توجہ دیں۔ خالد منصور الدین نے احادیث نبویؐ کی روشنی میں صحابہ کرامؓ کی تعظیم و تکریم پر زور دیا اور کہا کہ اہل بیت کی محبت کے ساتھ صحابہ کرام کی بھی عزت کرنا ضروری ہے۔

انہوں نے مزید کہا کہ ائمہ مجتہدین میں امام ابو حنیفہؓ، امام شافعیؓ، امام مالکؓ اور امام احمد بن حنبلؓ شامل ہیں، اور ان میں سے کسی ایک کی تقلید راہ نجات اور مغفرت کی ضمانت ہے۔

شیخ خالد منصور نے امام اہلسنت حافظ محمد انوار اللہ فاروقیؒ کی شخصیت اور ان کے کاموں کی تعریف کرتے ہوئے کہا کہ جامعہ نظامیہ کے فاضلین نے بہت اچھا کام کیا ہے اور ان کی خدمات کو سراہا۔

انہوں نے مسلمانوں کو تنبیہ کی کہ وہ رات بھر بریانی کھانے، پان، گٹکھا، اور تمباکو نوشی سے پرہیز کریں، موبائل کے زیادہ استعمال سے بچیں، اور اپنے بزرگوں کی قدر کریں۔

خالد منصور الدین نے مزید کہا کہ زندگی مختصر ہے اور ہمیں صرف اپنے اعمال اور عقائد پر توجہ دینی چاہیے۔ انہوں نے سید عبدالجبار گیلانی رحمت اللہ علیہ کی محنت اور سادگی کی مثال پیش کی اور نوجوانوں کو نصیحت کی کہ وہ تقویٰ، زہد، ورع، اور توکل کی زندگی گزاریں۔

اس موقع پر مختلف اہم شخصیات بھی موجود تھیں، جن میں عمدۃ الحکمت علامہ سید شاہ نعمت اللہ قادری، اسد العلماء مولانا محمد محسن پاشاہ انصاری، جناب صوفی شہباز قادری چشتی، اور دیگر حضرات شامل تھے۔