اسرائیلی فضائیہ کا لبنان کے رفیق حریری ہاسپٹل پر حملہ، 13 شہید
لبنان کی وزارت صحت کا کہنا ہے کہ دارالحکومت بیروت میں واقع ’رفیق حریری ہاسپٹل کے نواح میں رات کے وقت اسرائیلی فضائیہ نے بمباری کی، جس کے نتیجہ میں 13افراد شہید اور 57 زخمی ہوگئے۔
بیروت (یو این آئی) لبنان کی وزارت صحت کا کہنا ہے کہ دارالحکومت بیروت میں واقع ’رفیق حریری ہاسپٹل کے نواح میں رات کے وقت اسرائیلی فضائیہ نے بمباری کی، جس کے نتیجہ میں 13افراد شہید اور 57 زخمی ہوگئے۔
بین الاقوامی خبر رساں ادارے کی رپورٹ کے مطابق لبنان وزارت صحت نے بتایا کہ اسرائیلی فضائیہ نے رات کے وقت بیروت پر فضائی حملے کیے جن میں جنہّ میں واقع رفیق حریری سرکاری ہسپتال کے گرد و نواح کو بھی نشانہ بنایا ہے۔اسرائیلی بربریت کے نتیجے میں ایک بچے سمیت 13 افراد ہلاک اور 57 زخمی ہو گئے ہیں۔ زخمیوں میں سے 7 کی حالت تشویشناک ہے، جبکہ اسپتال کو بھی بڑے پیمانے پر نقصان پہنچا ہے۔
دوسری جانب غزہ میں اسرائیلی فوج کی بہیمانہ کارروائیوں کے نتیجے میں تباہ حال فلسطینیوں کو اپنے پیاروں کو دفنانے کے لئے کفن تک نہیں مل رہا۔بے گناہ فلسطینی عوام پر پے سر پے اسرائیلی حملوں میں مزید شہادتوں کا سلسلہ جاری ہے، شہیدوں کو دفنانے کے لئے تابوت اور کفن کم پڑ گئے۔
رپورٹ کے مطابق اسرائیلی فوج کی فائرنگ سے شہید ہونے والے درجنوں افراد کی لاشیں سڑکوں اور ملبے تلے بکھری پڑی ہیں۔غزہ کی وزارت صحت کے ڈائریکٹر منیر البرش کا کہنا ہے کہ بہت سے زخمی ہماری آنکھوں کے سامنے دم توڑ چکے ہیں اور ہم ان کے لیے کچھ نہیں کر سکے، انہوں نے لوگوں سے کوئی بھی کپڑا عطیہ کرنے کی اپیل کردی۔
اسرائیل فوج نے گزشتہ48گھنٹوں میں 115 فلسطینیوں کو شہید کردیا جبکہ سیکڑوں زخمی ہوگئے ہیں جنہیں طبی امداد کی فراہمی کے لئے بھی سہولیات میسر نہیں۔صہیونی فورسس نے شمالی غزہ کوچھاؤنی بنادیا۔ امداد کی ترسیل بند اور خوراک اور دوائیں ختم ہوچکی ہیں۔
Photo Source: @RealKON_
