تلنگانہ حکومت نے بھدراچلم رامالم کے از سرِ نو ترقیاتی کاموں کے لیے 351 کروڑ روپے منظور کیے

حیدرآباد: تلنگانہ حکومت نے تاریخی بھدراچلم شری سیتا رام چندر سوامی مندر کی از سرِ نو تعمیر اور بحالی کے لیے 351 کروڑ روپے منظور کیے ہیں۔ یہ رقم مشہور مندر میں بنیادی ڈھانچے اور زائرین کی سہولیات کو بہتر بنانے کی سمت میں ایک اہم قدم ہے۔

اوقاف (بندوبستی) محکمہ نے انتظامی حکم جاری کرتے ہوئے سرکاری حکم نمبر آر ٹی 167 کے ذریعے رقم کی پہلی قسط جاری کر دی ہے۔ یہ اقدام مندر کی مجموعی ترقی کے لیے تیار کیے گئے تین مرحلوں پر مشتمل جامع ماسٹر پلان کا حصہ ہے۔

بدھ کی دیر رات جاری ایک سرکاری بیان کے مطابق اس منصوبے کے لیے کل تخمینہ 586 کروڑ روپے ہے۔ بندوبستی محکمہ کی پرنسپل سکریٹری شیلجا راما ائیر نے بڑے پیمانے پر ترقیاتی کاموں کو آگے بڑھانے کے لیے ضروری انتظامی منظوریات جاری کر دی ہیں۔

مرکزی منصوبے میں عقیدت مندوں کے لیے سہولیات میں بہتری، مندر کے بنیادی ڈھانچے کو مضبوط بنانے اور رامالم کی روحانی و ثقافتی وراثت کو محفوظ رکھنے پر توجہ مرکوز کیے جانے کی توقع ہے۔

ریاستی وزیر تملا ناگیشور راؤ نے اس دوران مندر کی از سرِ نو ترقی کے لیے مناسب فنڈ منظور کرنے پر وزیر اعلیٰ اے ریونت ریڈی کا شکریہ ادا کیا۔ انہوں نے کہا کہ اس منصوبے سے مذہبی سیاحت کو نمایاں فروغ ملے گا اور ہر سال بھدراچلم آنے والے ہزاروں زائرین کے لیے بہتر سہولیات فراہم ہوں گی۔