تلنگانہ: ضلع نرمل میں ایک ہی دن میں دوتیندوے۔دیہاتیوں میں خوف

حیدرآباد: تلنگانہ کے ضلع نرمل کے خانہ پورمنڈل میں ایک ہی دن میں دو الگ الگ مقامات پر دو تیندوے نظرآئے جن کی نقل و حرکت نے مقامی دیہاتیوں میں زبردست خوف و ہراس پھیلا دیا۔

خانہ پورکے مضافات میں کومرم بھیم چوراہے سے ترلاپاڑو جانے والے راستہ پر ایک تیندوا سڑک عبور کرتے ہوئے دیکھا گیا جسے ایک کار سوار مسافر نے اپنے موبائل فون کے کیمرے میں قید کر لیا۔

اس واقعہ کے چند ہی منٹ بعد دلاور پور کے مضافات میں واقع بوکلا گٹہ کے قریب ایک کھیت میں ایک اور تیندوادیکھا گیا جس کی نقل وحرکت کسان کی جانب سے نصب کردہ سی سی ٹی وی کیمروں میں ریکارڈ ہو گئیں۔

سوشل میڈیا پر ان ویڈیوز کے وائرل ہونے کے بعد محکمہ جنگلات نے فوری کارروائی کرتے ہوئے ترلاپاڑو اور دلاور پور کے کسانوں اور عام شہریوں کے لئے الرٹ جاری کر دیا۔ حکام کا کہنا ہے کہ حالیہ جانوروں کی گنتی کے مطابق علاقہ میں تیندووں کی تعداد میں نمایاں اضافہ ہوا ہے۔