غیر مسلم نوجوان سے محبت کی شادی کا خوفناک انجام: ہندو شوہر نے سعدیہ کا بے دردی سے قتل کردیا

مرادآباد: اتر پردیش کے مرادآباد میں ایک 9 سالہ طویل محبت کی شادی کا افسوسناک اختتام ہوا جب سعدیہ نامی خاتون کو اس کے شوہر انکور چوہان نے شک کی بنیاد پر قتل کر دیا۔ سعدیہ، جو شادی کے بعد ساکشی چوہان بن گئی تھی، اپنی سات سالہ بیٹی کے ساتھ رہ رہی تھی۔

انکور اپنی بیوی پر شک کرنا شروع کر دیا، جو ایک کمپنی میں ملازمت کر رہی تھی۔ شوہر اور بیوی کے درمیان آئے دن جھگڑے ہوتے تھے، اور بالآخر انکور نے اپنی بیوی کا گلا دبا کر اس کی جان لے لی۔

پولیس نے بتایا کہ ہفتہ کی رات انکور نے بیوی کا قتل کرنے کے بعد کمرے کو تالا لگا دیا اور فرار ہو گیا۔ پڑوسیوں کی اطلاع پر پولیس نے موقع پر پہنچ کر دروازہ توڑا اور سعدیہ کی لاش برآمد کی۔ بعد میں پولیس نے انکور چوہان کو گرفتار کر کے جیل بھیج دیا۔

سعدیہ کا تعلق مرادآباد کے سرجان نگر علاقے سے تھا اور 9 سال قبل اس نے اپنے خاندان کی مخالفت کے باوجود انکور چوہان سے محبت کی شادی کر لی تھی۔ شادی کے بعد سعدیہ نے اپنا نام تبدیل کر کے ساکشی چوہان رکھ لیا تھا۔

دونوں نے کرائے کے مکان میں زندگی شروع کی، لیکن مالی مشکلات اور شک کی بنا پر انکور اور سعدیہ کے درمیان تنازعات بڑھتے گئے۔

ہفتے کی رات ہونے والے جھگڑے کے بعد انکور نے اپنی بیوی کو قتل کر دیا، جبکہ ان کی سات سالہ بیٹی دعا اس واقعے کی گواہ بنی۔ سعدیہ کی تدفین سرجان نگر کے مقامی قبرستان میں کر دی گئی ہے۔

مسلم معاشرے میں ایسے واقعات مسلسل منظر عام پر آ رہے ہیں، جہاں نوجوان غیر مسلموں کے ساتھ محبت کی شادی کر کے مشکلات کا شکار ہو رہے ہیں اور یہ واقعات سنگین نتائج کا سبب بن رہے ہیں۔