اسکول بس میں لگی خوفناک آگ،بڑا حادثہ ٹل گیا

حیدرآباد: رنگاریڈی ضلع کے کاٹے دان علاقے میں آج صبح ایک بڑا حادثہ ٹل گیا جب دہلی پبلک اسکول نادرگُل کی ایک بس اچانک آگ کی لپیٹ میں آگئی۔ اطلاعات کے مطابق، بس طلبہ کو ان کے گھروں پر چھوڑنے کے بعد واپس اسکول کی طرف جا رہی تھی کہ اسی دوران بس کے انجن حصے سے اچانک دھواں اٹھنا شروع ہوا۔

ڈرائیور نے فوری طور پر ہوشیاری کا مظاہرہ کرتے ہوئے بس کو سڑک کے کنارے روک دیا اور خود باہر نکل آیا۔ چند ہی لمحوں میں پوری بس آگ کے شعلوں میں گھِر گئی اور دیکھتے ہی دیکھتے مکمل طور پر جل کر خاکستر ہوگئی۔

مقامی افراد نے فوراً فائر بریگیڈ کو اطلاع دی۔ چندرایان گٹہ کے فائر عملے نے موقع پر پہنچ کر آگ پر قابو پالیا۔
خوش قسمتی سے حادثے کے وقت بس میں کوئی طالب علم موجود نہیں تھا، جس کی وجہ سے ایک بڑے سانحے سے بچاؤ ممکن ہو سکا۔

پولیس نے جائے وقوعہ پر پہنچ کر معائنہ کیا اور آگ لگنے کی وجوہات جاننے کے لیے تفتیش شروع کر دی ہے۔
ابتدائی شبہ ہے کہ آگ الیکٹریکل خرابی یا شارٹ سرکٹ کے باعث لگی ہو سکتی ہے۔

فائر ڈیپارٹمنٹ نے اسکول انتظامیہ کو ہدایت دی ہے کہ وہ اپنی تمام بسوں کی ٹیکنیکل جانچ کروائیں تاکہ مستقبل میں اس طرح کے حادثات سے بچا جا سکے۔