ٹیکساس میں 122  غیر ملکی طلبا کے ویزا منسوخ

ٹیکساس: ٹرمپ انتظامیہ کی جانب سے امریکی ریاست ٹیکساس میں 122 سے زائد بین الاقوامی طلبا کے ویزا منسوخ کردیے گئے۔بین الاقوامی خبر رساں ادارے کی رپورٹ کے مطابق امریکہ بھر میں طلبا ویزا منسوخی میں ٹیکساس اب تک سرفہرست ہے۔

امریکی میڈیا کا اس حوالے سے کہنا ہے کہ اسٹوڈنٹ ایکسچینج وزیٹر پروگرام (ایس ای وی آئی ایس) سے طلبا کی امیگریشن ختم کردی گئی، 8 جامعات متاثر ہوئی ہیں۔ یو این ٹی اور یو ٹی ارلنگٹن میں 27، 27 طلبا کی حیثیت ختم کی گئی، متاثرہ طلبہ کی اکثریت کا تعلق ساؤتھ ایشائی ممالک اور مشرقِ وسطیٰ سے ہے۔

واضح رہے کہ امریکہ میں غیرملکیوں کی رجسٹریشن کی ڈیڈ لائن آج ختم ہوگئی، رجسٹریشن کیلئے آخری تاریخ 11 اپریل مقرر کی گئی تھی۔غیرملکیوں کی رجسٹریشن کا ایکٹ صدر ٹرمپ کے ایگزیکٹیو آرڈر کے تحت نافذ کیا گیا ہے، ٹرمپ نے 20 جنوری کو امیگریشن سسٹم کے تحت غیر ملکیوں کی رجسٹریشن ایکٹ پر دستخط کئے تھے۔

ایکٹ کے تحت14سال کی عمرکو پہنچنے والے غیرملکیوں کو بھی رجسٹرڈ ہونے کی ہدایت کی گئی ہے،تمام غیرملکیوں کو رجسٹریشن ہروقت اپنے پاس رکھنے کی ہدایت جاری کی گئی۔ایگزیکٹیو آرڈرکے تحت گرین کارڈ اور ورک پرمٹ والے افراد رجسٹرڈ تصور کئے جائیں گے، گرین کارڈ اور ورک پرمٹ والے افراد کو رجسٹرڈ ہونے کی ضرورت نہیں۔

اس حوالے سے ہوم لینڈ سیکیورٹی کی سیکریٹری کرسٹی نوئم کا کہنا ہے کہ امریکا میں 30دن سے زائد قیام پر رجسٹریشن لازمی کرانا ہوگی۔سیکریٹری ڈی ایچ ایس نے کہا کہ غیرملکیوں کا رجسٹرڈ نہ ہونا قانونی جرم ہے جس پر قید اور جرمانے ہوں گے، امریکی صدرڈونلڈ ٹرمپ کا غیرقانونی مقیم افراد کیلئے واضح پیغام ہے کہ غیرقانونی طور پر امریکہ میں موجود غیر ملکی اب واپس چلے جائیں۔

کرسٹی نوئم نے کہا کہ اگرآپ ابھی چلے جاتے ہیں تو آپ کو وطن واپس لوٹنے کا موقع مل سکتا ہے، جس سے آپ کو دوبارہ قانونی طریقے سے ہماری آزادی سے لطف اندوز ہونے کا موقع مل سکتا۔

انہوں نے کہا کہ بصورت دیگر ٹرمپ انتظامیہ تمام امیگریشن قوانین کو سختی سے نافذ کرے گی، ہمیں یہ جاننا ہے کہ امریکیوں کی سلامتی کیلئے ہمارے ملک میں کون موجود ہے؟۔