بجٹ میں وزارت دفاع کے لیے 7.85 لاکھ کروڑ روپے مختص کیے گئے، جو کل بجٹ کا 14.68 فیصد

بستی: اتر پردیش کے ضلع بستی کے 13 مزدوروں کے سعودی عرب میں پھنسے ہونے کی اطلاع سامنے آئی ہے۔ اہل خانہ کا کہنا ہے کہ وہاں انہیں نہ تو اجرت دی جا رہی ہے اور نہ ہی کھانے پینے کی مناسب سہولت میسر ہے، جس کے باعث ان کی حالت خراب ہوتی جا رہی ہے۔

شہر تھانہ علاقے کے بھٹہا گاؤں کے رہائشی رام جیت یادو نے بتایا کہ ان کا بیٹا ستیہ نارائن 27 دسمبر 2024 کو روزگار کے سلسلے میں سعودی عرب گیا تھا۔ ابتدا میں اس نے دو تین مرتبہ 13-13 ہزار روپے گھر بھیجے، لیکن بعد میں رقم آنا بند ہو گئی اور فون پر اس نے مالی تنگی کی بات بتائی۔

ہفتہ کے روز سوشل میڈیا پر وائرل ہونے والی ایک ویڈیو میں دعویٰ کیا گیا ہے کہ بستی ضلع کے ستیہ نارائن، گورکھ ناتھ، پھول سنگھ، رام پریت، روپ چندر، گوکل، گریش چندر، جسونت، جوگیندر، کرونا، پنکج یادو، شبھم اور وجے کمار سمیت مجموعی طور پر 13 مزدور سعودی عرب کے شہر ابہا میں پھنسے ہوئے ہیں۔

ویڈیو میں یہ بھی کہا گیا ہے کہ وہاں تقریباً 161 ہندوستانی شہری موجود ہیں جنہیں اجرت نہیں دی جا رہی اور ان کے پاسپورٹ و دیگر ضروری دستاویزات ضبط کر لیے گئے ہیں۔ تاہم وائرل ویڈیو کی آزادانہ طور پر تصدیق نہیں ہو سکی ہے۔

اس معاملے میں پولیس نے اہل خانہ سے پوچھ گچھ شروع کر دی ہے اور جن ایجنٹوں کے ذریعے مزدور بیرون ملک گئے تھے، ان کی تلاش جا رہی ہے۔ ویڈیو سامنے آنے کے بعد اہل خانہ اور مقامی لوگوں نے سوشل میڈیا کے ذریعے حکومت ہند سے مدد کی اپیل کی ہے۔