عثمانیہ یونیورسٹی کی آرٹس کالج عمارت کو ٹریڈ مارک کے طور پر رجسٹر کیا جائے گا

حیدرآباد: عثمانیہ یونیورسٹی کی شہرہ آفاق تاریخی آرٹس کالج کی عمارت کا بہت جلد ٹریڈ مارک کے طور پر رجسٹر کیا جائے گا۔ ہندوستان میں تاج محل ہوٹل اور بمبئی اسٹاک اکسچینج کے بعد عثمانیہ یونیورسٹی کی آرٹس کالج کی عمارت تیسری بلڈنگ ہوگی جسے ٹریڈ مارک کے طور پر رجسٹر کیا جائے گا۔

 آر ٹس کالج کے بیرونی ڈیزائن کو ٹریڈ مارک کے طور پر رجسٹر کرانے کے لئے اپریل 2024 میں ایک درخواست دی گئی تھی اور ٹی ایم جرنل میں اشاعت کی درخواست کو قبول کرلیا گیا۔ رجسٹریشن کا عمل امکان ہے کہ آئندہ 4 سے 5 ماہ میں شروع ہوگا۔

 سبھا جیت سہا‘ ٹی ایم ایجنٹ وبانی ریسولیو 4IP نے پروفیسر جی بی ریڈی انٹلکچول پراپرٹی رائٹس (آئی پی آر) او یو (عثمانیہ یونیورسٹی) جو پروموشن آف انڈسٹری اور انٹرنل ٹریڈ کا ایک شعبہ ہے‘ کی مدد سے یونیورسٹی نے یہ درخواست داخل کی ہے۔

 آرٹس کالج کی عمارت 1939 سے عثمانیہ یونیورسٹی اور حیدرآباد کے جمالیاتی حسن کا حصہ رہی ہے۔ گلابی پتھروں کی یہ عمارت‘ اجنتا‘ ایلورا کے ستونوں اور کنٹل طرز پر تعمیر کی گئی اس عمارت میں محرابیں بھی ہیں جو انڈو۔ اسلامک (سارا سینک) فن تعمیر کی شاندار روایت کی عکاسی ہے۔

حیدرآباد کے ساتویں نظام میر عثمان علی خان بہادر نے 4 دسمبر 1939 کو اس تارِیخی عمارت (آرٹس کالج) کا افتتاح کیا تھا۔ قطب شاہی اور مغل فن تعمیر کا حسین امتراج‘ گرینائٹ اسٹرکچر کا ڈیزائن بلجیم کے عظیم معمار مونسیرجیپر نے دیا تھا۔

 یہ عمارت 164 کمروں اور 2.5 لاکھ مربع فیٹ پر محیط ہے۔ حیدرآبادی نظام کے تعمیر کردہ عمارتوں میں سے آرٹس کالج کی خوبصورت عمارت آخری عمارت ہے۔ آرٹس کالج‘ ہندوستان کی تیسری عمارت ہوگی جسے ٹریڈ مارک کے طور پر رجسٹر کیا جائے گا اس سے قبل تاج محل ہوٹل اور بمبئی اسٹاک اکسچینج کی عمارتوں کو ٹریڈ مارک کے طور پر رجسٹر کیا جاچکا ہے۔

 سہا نے امید ظاہر کی کہ عثمانیہ یونیورسٹی کی آرٹس کالج عمارت ایک برانڈ بن جائے گی۔ انہوں نے مزید کہا کہ اور کئی خوبصورت عمارتوں جیسے ٹی ہب‘ ٹی ورکس اور تلنگانہ سکریٹریٹ کو بھی ٹریڈ مارک کے طور پر رجسٹر کرایا جاسکتا ہے۔