فیملی ڈیجیٹل کارڈز کا پائلٹ سروے منظم انداز میں کیا جائے: وزیر پونگولیٹی سرینواس ریڈی

نظام آباد: ریاستی وزیر ریونیو پونگولیٹی سرینواس ریڈی اور چیف سکریٹری مسز اے شانتی کماری نے آج کلکٹروں کے ساتھ ویڈیو کانفرنس میں کہا کہ ریاست میں فیملی ڈیجیٹل کارڈز کے اجرا کے لیے جاریہ ماہ 3 اکتوبر 2024ء سے پائلٹ پروگرام کے تحت تجرباتی سروے کیا جا رہا ہے۔

انہوں نے مزید کہا کہ فیملی ڈیجیٹل کارڈز کا سروے، شہروں اور شہری علاقوں کی توسیع، لینڈ ریگولرائزیشن (LRS) درخواستوں کا تیزی سے حل، اور ڈبل بیڈروم مکانات کی الاٹمنٹ کے لیے اہل استفادہ کنندگان کا انتخاب جیسے امور پر توجہ دی جائے گی۔

وزیر نے ہدایت دی کہ ہر اسمبلی حلقے میں دو گاؤں میں تجرباتی سروے کیا جائے گا جبکہ شہری حلقوں کے لیے دو وارڈز یا ڈویژن منتخب کیے جائیں گے۔ گھر گھر معائنہ کرنے کی ضرورت پر زور دیتے ہوئے انہوں نے کہا کہ سروے کو 8 اکتوبر 2024ء تک مکمل کر لیا جائے۔

وزیر نے مزید ہدایت دی کہ کلکٹرز 9 اکتوبر کو جانچ کریں اور 10 اکتوبر کو ایک جامع رپورٹ پیش کریں۔ انہوں نے یہ بھی واضح کیا کہ سروے کے دوران خاندان کی تصویر جمع کرنا لازمی نہیں ہے اور کسی کو تصویر لینے کے لیے مجبور نہیں کیا جائے گا۔

پونگولیٹی سرینواس ریڈی نے کہا کہ ہر ٹیم کو روزانہ 30 سے 40 خاندانوں کا سروے مکمل کرنے کی منصوبہ بندی کرنی چاہیے تاکہ پائلٹ سروے مقررہ تاریخ کے اندر مکمل ہو سکے۔

حکومت کا مقصد یہ ہے کہ ریاست میں تمام لوگوں کو، چاہے وہ امیر ہوں یا غریب، ڈیجیٹل کارڈ جاری کر کے سرکاری پروگراموں سے مستفید ہونے کی سہولت فراہم کی جائے۔

انہوں نے مزید کہا کہ پائلٹ سروے کی تکمیل کے بعد ریاست میں فیملی ڈیجیٹل کارڈز کے اجرا کے اقدامات کیے جائیں گے۔

ویڈیو کانفرنس میں کلکٹر راجیو گاندھی ہنمنتو، ایڈیشنل کلکٹرس انکت، کرن کمار، اور دیگر متعلقہ محکموں کے افسران نے شرکت کی۔