پولیو سےمتاثرہ بیٹے کو ماں نے گود میں اُٹھاکر ایس ایس سی کے امتحانی مرکز پہنچایا (ویڈیو)

حیدرآباد: تلنگانہ کے ضلع نرمل میں ایک ماں نے اپنے معذور اور پولیو سے متاثربیٹے کو گود میں اٹھا کر دسویں جماعت کے امتحانی مرکزکے اندر پہنچایا۔ضلع کے سارنگاپورمنڈل کے چنچولی بی علاقہ سے تعلق رکھنے والاچرن پولیو سے متاثر ہے۔

اس کے ہاتھ بھی مناسب طورپر کام نہیں کرتے تاہم اس کے باوجود تعلیم حاصل کرنے کی وہ خواہش رکھتا ہے۔15ماہ پہلے اس کے باپ کی موت ہوگئی۔تب ہی سے اس کی ماں پدما بیڑی بنانے کا کام کرتے ہوئے اپنے مائیکے میں مقیم ہے۔

قبل ازیں چرن کو اس کا دادا اسکول چھوڑتاتھاتاہم اب وہ عمر کی زیادتی کی وجہ سے ایسا کرنے سے مجبور ہے۔چرن کے دسویں جماعت کے امتحان کے پیش نظراس کی ماں آٹو کے ذریعہ اس کو امتحانی مرکز لے آئی جہاں سے اس کو گود میں اٹھا کراس نے امتحانی مرکز میں اس کیلئے الاٹ نشست پر اس کو پہنچایا۔اس نے بتایا کہ معذوروں کو الاٹ کردہ اسکرائب کی مدد سے اس کے بیٹے نے امتحان تحریر کیا۔