وزیراعظم نے وارانسی میں انٹرنیشنل کرکٹ اسٹیڈیم کا سنگ بنیاد رکھا

وارانسی: وزیر اعظم نریندر مودی نے ہفتہ کو اپنے پارلیمانی حلقہ وارانسی میں تقریباً 451 کروڑ روپے کی لاگت سے بین الاقوامی کرکٹ اسٹیڈیم کا سنگ بنیاد رکھا۔

اس موقع پر وزیر اعلیٰ یوگی آدتیہ ناتھ کے علاوہ سابق کرکٹر سنیل گواسکر، سچن تیندولکر، کپل دیو، گنڈپا وشواناتھ، بی سی سی آئی کے صدر راجر بنی، سکریٹری جئے شاہ اور راجیو شکلا سمیت ہندوستانی کرکٹ کی کئی معروف شخصیات موجود تھیں۔

یہ اسٹیڈیم ریاست کا تیسرا بین الاقوامی اسٹیڈیم ہے جبکہ یہ بی سی سی آئی کا پہلا اسٹیڈیم ہے۔وارانسی کے گانجری، راجاتلاب، میں تعمیر ہونے والا جدید بین الاقوامی کرکٹ اسٹیڈیم تقریباً 450 کروڑ روپے کی لاگت سے 30 ایکڑ سے زیادہ کے رقبے میں تیار کیا جائے گا۔

اس اسٹیڈیم کی تھیمیٹک آرکیٹیکچرل انسپائریشن بھگوان شیوا سے لی گئی ہے، جس میں نصف چاند کی شکل کی چھت کے کور، ترشول کی شکل کی فلڈ لائٹس، گھاٹ کی سیڑھیوں پر مبنی بیٹھنے کا انتظام، بلوی پتر کی شکل کی دھاتی چادریں تیار کی گئی ہیں۔ اس اسٹیڈیم کی گنجائش 30 ہزار شائقین ہوگی۔