سیاسی جماعتوں میں اتحاد کی کوئی اہمیت نہیں:کے ٹی آر

حیدرآباد: کارگذار صدر بی آر ایس کے ٹی راما راؤ نے کہا کہ ملک کی سیاسی جماعتوں میں اتحاد کی کوئی اہمیت نہیں ہے۔ اہمیت اس بات کی ہے کہ ملک کی موجودہ صورتحال کے تناظر میں عوام میں اتحاد قائم ہو۔

پٹنہ میں حزب اختلاف کی جماعتوں کے اجلاس پر تبصرہ کرتے ہوئے کے ٹی راما راؤ نے کہا کہ ایسے اجلاس بے فیض ہیں۔ ملک میں مسائل کی وجہ کانگریس ا ور بی جے پی ہیں۔

یہی وہ دو پارٹیاں ہیں جو مسائل پیدا کررہی ہیں۔ کے ٹی راما راؤ نے کہا کہ اگر تمام سیاسی جماعتیں بی جے پی یا کانگریس کے ساتھ ہوجاتی ہیں پھر ملک کیلئے کوئی فائدہ نہیں ہوگا۔ کے ٹی راما راؤ ٹوئٹر پر اپنے خیالات کااظہار کررہے تھے۔

یہاں اس بات کا تذکرہ ضروری ہے کہ ملک سے بی جے پی حکومت کا خاتمہ کرنے کیلئے چیف منسٹر بہار نتیش کمار کی قیادت میں آج پٹنہ میں مخالف بی جے پی جماعتوں کا مشاورتی اجلاس منعقد ہورہا ہے۔ اہم بات یہ ہے کہ اس اجلاس میں بی آر ایس سربراہ کے سی آر کو مدعو نہیں کیا گیا۔