سائیکلون ارنب کا خطرہ، وشاکھاپٹنم پولیس کی عوام سے ساحل خالی کرنے کی اپیل

وشاکھاپٹنم: شدید سمندری طوفان ارنب کے آندھرا پردیش کے ساحل کی جانب بڑھنے کے پیش نظر وشاکھاپٹنم پولیس نے عوام سے اپیل کی ہے کہ وہ ساحلوں کو خالی کردیں اور سمندر کے قریب جانے سے گریز کریں۔ سمندر میں تیز لہروں اور خراب موسمی حالات کے باعث ساحلی علاقوں میں احتیاطی اقدامات کیے جارہے ہیں۔

موسمی پیش گوئی کے مطابق، مغربی وسطی خلیج بنگال میں موجود انتہائی شدید سمندری طوفان 27 اکتوبر کی شام تک مغرب اور شمال مغرب کی سمت بڑھنے کا امکان ہے۔ اس کے بعد طوفان شمال مغرب کی جانب پیش قدمی کرے گا۔

پیش گوئی کے مطابق، طوفان 28 اکتوبر 2026 کی صبح باپٹلا اور وشاکھاپٹنم کے درمیان، یانم کے قریب، آندھرا پردیش اور یانم کے ساحلی علاقوں سے ٹکرا سکتا ہے۔

طوفان کے دوران ہواؤں کی زیادہ سے زیادہ رفتار 125 سے 135 کلومیٹر فی گھنٹہ رہنے کا امکان ہے، جبکہ جھکڑوں کی رفتار 150 کلومیٹر فی گھنٹہ تک پہنچ سکتی ہے۔

طوفان کے ممکنہ خطرے کے پیش نظر وشاکھاپٹنم پولیس نے مقامی افراد اور سیاحوں کو ہدایت دی ہے کہ وہ ساحلوں سے دور رہیں اور سمندر میں جانے کی کوشش نہ کریں۔ عوام سے یہ بھی کہا گیا ہے کہ وہ سرکاری ہدایات پر عمل کریں اور احتیاط برتیں۔

حکام طوفان کی نقل و حرکت اور ساحلی علاقوں پر اس کے ممکنہ اثرات پر نظر رکھے ہوئے ہیں۔ صورتحال کے مطابق مزید ہدایات جاری کیے جانے کا امکان ہے۔