کیرالہ دھماکے میں دو ہلاک، 52 زخمی

کوچی: کیرالہ کے کوچی میں اتوار کی صبح عیسائی برادری یہووا وٹنس کے ایک دعائیہ جلسے میں ہوئے سلسلہ وار دھماکوں میں اب تک دو لوگوں کی موت ہو گئی ہے اور 52 دیگر زخمی ہو گئے ہیں۔

کیرالہ کی وزیر صحت وینا جارج نے کہا کہ تھوڈپوزا کی رہنے والی 56 سالہ کماری کی آج شام یہاں کے ایک اسپتال میں جھلسنے سے موت ہوگئی۔

انہوں نے کہا ’’مختلف اسپتالوں میں لے جانے والے 52 زخمیوں میں سے 30 اب بھی زیر علاج ہیں۔‘‘ 18 شدید زخمی آئی سی یو میں ہیں۔ ایک بچے سمیت چھ کی حالت انتہائی تشویشناک ہے۔

کوچی سے تعلق رکھنے والے ایک شخص نے اتوار کو تھریسور ضلع کے کوڈاکارا پولیس اسٹیشن میں خودسپردگی کی اور اعتراف کیا کہ اس نے یہاں کالامسری میں عیسائی برادری کے ایک دعائیہ جلسے میں ایک طاقتور دھماکہ خیز ڈیوائس (آئی ای ڈی) نصب کی تھی۔