دو نوجوان لڑکیوں کی مشتبہ حالت میں موت

حیدرآباد: حیدرآباد کے بالاپور علاقہ میں دو نوجوان لڑکیوں کی مشتبہ حالت میں موت سے سنسنی پھیل گئی ہے۔ ونِیلا اور اَکھیلا نامی دو بہنوں کے اپنے گھر میں پھانسی لے کر خودکشی کر لینے کا شبہ ظاہر کیا جا رہا ہے۔

مقامی افراد نے پولیس کو اطلاع دی، جس پر پولیس وہاں پر پہنچی اور مقدمہ درج کر کے جانچ شروع کر دی۔گھر میں اُس وقت کوئی اور موجود نہ تھا، اس لئے پولیس نے اسے مشتبہ موت کا کیس قرار دیا ہے۔

مقامی افراد کا کہنا ہے کہ بڑی بہن ونِیلا نے کسی نوجوان سے محبت کی شادی کی تھی اور گھر چھوڑ کر چلی گئی تھی۔ بعد ازاں خاندان والوں نے بین ذات شادی پر اعتراض کرتے ہوئے اُسے گھر واپس لایا تھا۔

اس کے بعد سے دونوں بہنوں کے رویہ میں تبدیلی دیکھی گئی تھی۔ان حالات میں پولیس یہ تحقیقات کر رہی ہے کہ آیا دونوں بہنوں نے واقعی خودکشی کی ہے یا کسی نے ان کا قتل کر کے اسے خودکشی کا رنگ دینے کی کوشش کی ہے۔