طب یونانی انسانی صحت اور معاشی استحکام کا ضامن، حکیم غریبوں کے مسیحا قرار
اختتامی سیشن میں یونانی ڈرگس مینوفیکچررز ایسوسی ایشن نے مرحوم حکیم غوث الدین اور حکیم ابو الحسن اشرف کو خراج عقیدت پیش کیا۔ کنونشن کے دوران فری ہیلتھ کیمپ اور فری حجامہ کیمپ سے سینکڑوں افراد مستفید ہوئے۔
حیدرآباد: دو روزہ یونانی کنونشن اختتام پذیر ہوگیا، جس میں نئے عزائم اور یونانی طب کی افادیت کو اجاگر کیا گیا۔ کنونشن میں ملک کے مختلف علاقوں سے یونانی اطباء، اسکالرز، ماہرین اور طلبہ کی بڑی تعداد نے شرکت کی۔
اختتامی سیشن کے دوران ڈاکٹر حامد احمد، ڈائریکٹر ہمدرد، نے کہا کہ طب یونانی انسانی صحت اور معاشی استحکام کا ضامن ہے اور وہ امراض جنہیں تجارتی مقاصد کے تحت لاعلاج قرار دیا جاتا ہے، ان کا کفایتی علاج یونانی طب میں ممکن ہے۔ انہوں نے طلبہ اور اسکالرز کو ادویات سازی کے تمام مراحل سے واقف کرایا تاکہ وہ ہر چیلنج کا مقابلہ کرسکیں۔
حکیم غلام محی الدین، آرگنائزنگ سکریٹری، نے طب یونانی میں ہڈیوں کے علاج کے قدیم اور جدید طریقوں پر تفصیل سے روشنی ڈالی۔ انہوں نے بتایا کہ یونانی طریقہ علاج نہ صرف کفایتی ہے بلکہ اس سے کوئی نقص بھی باقی نہیں رہتا۔ انہوں نے کہا کہ ایک یونانی طبیب ہر فن سے واقف ہوتا ہے اور غریبوں کے لیے مسیحا کی حیثیت رکھتا ہے۔
ڈاکٹر سعید احمد نے دوا کی تعریف کرتے ہوئے کہا کہ ہر مصائب جو انسانی جسم کی فزیالوجی کو متاثر کرے، وہ دوا کے دائرے میں آتا ہے۔ انہوں نے ڈرگس مینوفیکچررز کو تلقین کی کہ وہ تیار کی جانے والی ہر دوا کے اجزاء سے بخوبی واقف رہیں اور معیار کو بلند رکھیں۔
ڈاکٹر محمد خالد، اسسٹنٹ ڈرگ کنٹرولر، نے قوانین اور رہنما اصولوں پر روشنی ڈالی اور یونانی دوا سازوں کو ہمیشہ قوانین کی پابندی کرنے کی ہدایت کی۔ انہوں نے بتایا کہ صرف پرانے شہر حیدرآباد سے یونانی میڈیسن کا سالانہ بزنس 250 کروڑ ہے۔
ڈاکٹر فضل احمد نے ایلوپیتھک ڈرگس کے کاروبار کے اعداد و شمار بتاتے ہوئے کہا کہ 2025 میں ایلوپیتھک ڈرگس کا ٹرن اوور 4 لاکھ 71 ہزار کروڑ ہے، جس میں 40 فیصد نسخے آیوش ڈاکٹروں نے تجویز کیے۔ انہوں نے یونانی اطباء سے اپیل کی کہ وہ یونانی ادویات ہی تجویز کریں۔
اختتامی سیشن میں یونانی ڈرگس مینوفیکچررز ایسوسی ایشن نے مرحوم حکیم غوث الدین اور حکیم ابو الحسن اشرف کو خراج عقیدت پیش کیا۔ کنونشن کے دوران فری ہیلتھ کیمپ اور فری حجامہ کیمپ سے سینکڑوں افراد مستفید ہوئے۔
کنونشن میں ڈاکٹر شکیب، ڈاکٹر رحمن، حکیم حسام الدین طلعت، حکیم حضیر بقائی، پروفیسر ڈاکٹر شہباز بیگ (ٹمکور)، ڈاکٹر نعمان، ڈاکٹر لقمان، ڈاکٹر رفیع حیدر شکیب، ظفر الاسلام، پروفیسر عمران انصاری، منہاج الدین خان، محمد امجد علی (فیض) اور ڈاکٹر محمد ارشد علی نے اہم کردار ادا کیا۔
