اردو اکیڈمی تلنگانہ کی جانب سے مرحوم صحافیوں کے ارکان خاندان کے لیے عبوری امداد کی رقم میں اضافہ
یہ فیصلہ تلنگانہ اردو ورکنگ جرنلسٹس فیڈریشن کی نمائندگی کے بعد کیا گیا۔ گذشتہ ہفتہ دو سینئر اردو صحافیوں شیخ نصیر الدین (روزنامہ منصف) اور سید قادرمحی الدین وحید قادری (راشٹریہ سہارا اور روبی چینل) کی یاد میں منعقدہ تعزیتی اجلاس کے دوران فیڈریشن کی جانب سے اس رقم میں اضافہ کا مطالبہ کیا گیا تھا۔
حیدرآباد: صدرنشین اردو اکیڈیمی تلنگانہ جناب طاہر بن حمدان نے ریاست کے مرحوم اردو صحافیوں کے ارکان خاندان کی مدد کے لیے ایک ہمدردانہ قدم اٹھاتے ہوئے عبوری مالی امداد کی رقم کو 20ہزار روپے سے بڑھا کر 25ہزار روپے کردیا ہے۔
یہ فیصلہ تلنگانہ اردو ورکنگ جرنلسٹس فیڈریشن کی نمائندگی کے بعد کیا گیا۔ گذشتہ ہفتہ دو سینئر اردو صحافیوں شیخ نصیر الدین (روزنامہ منصف) اور سید قادرمحی الدین وحید قادری (راشٹریہ سہارا اور روبی چینل) کی یاد میں منعقدہ تعزیتی اجلاس کے دوران فیڈریشن کی جانب سے اس رقم میں اضافہ کا مطالبہ کیا گیا تھا۔
اس وقت اردو اکیڈمی نے مرحومین کے ارکان خاندان کو فی کس 20ہزار روپے دینے کا اعلان کیا تھا۔ تاہم، اجلاس کے دوران امدادی رقم میں اضافہ کا مطالبہ کیا گیا، جس پر اکیڈمی کے اسسٹنٹ ڈائریکٹر وی کرشنا نے صدرنشین سے منظوری دلوانے کی یقین دہانی کروائی۔ بعد ازاں صدرنشین نے اس اضافہ کی منظوری دے دی۔
اضافی رقم شیخ نصیر الدین کے فرزند شیخ امتیاز کو اردو اکیڈمی کے دفتر، واقع حج ہاؤس، میں حوالے کی گئی۔ جب کہ وحید قادری کے ارکان خاندان کو یہ رقم اکیڈمی کے عہدیداران ان کی رہائش گاہ پہنچ کر جلد فراہم کریں گے۔
اردو اکیڈمی میں ہونے والی اس تقریب میں فیڈریشن کے صدرجناب ایم اے ماجد، جنرل سکریٹری جناب سید غوث محی الدین، اور اسسٹنٹ ڈائریکٹر وی کرشنا موجود تھے ۔
اردو میڈیا سے وابستہ افراد نے اکیڈمی کے اس اقدام کو سراہتے ہوئے اسے ایک خوش آئند قدم قرار دیا ہے، جو اردو صحافیوں کی فلاح و بہبود کے لیے حکومت کی سنجیدگی کو ظاہر کرتا ہے۔
