وشیش شرما نے جیتا ایک کروڑ کا گولکنڈہ ماسٹرز ٹائٹل

حیدرآباد :  مقامی پسندیدہ 19 سالہ وشیش شرما نے حیدرآباد گولف ایسوسی ایشن میں منعقدہ ایک کروڑ روپے کے تلنگانہ گولکنڈہ ماسٹرز میں شاندار کارکردگی کا مظاہرہ کرتے ہوئے اپنا پہلا پروفیشنل خطاب جیت لیا۔ انہوں نے 21 انڈر 259 کے اسکور کے ساتھ نوئیڈا کے امر دیپ ملک کو ایک اسٹروک سے پیچھے چھوڑا۔

ڈی پی ورلڈ پی جی ٹی آئی میں دوسرے سیزن میں کھیل رہے وشیش نے آخری راؤنڈ میں ایک انڈر 69 کا اسکور کیا اور 15 لاکھ روپے کی انعامی رقم حاصل کی۔ اس کامیابی سے وہ 2026 آرڈر آف میرٹ میں 25ویں سے 14ویں مقام پر پہنچ گئے اور ان کی سیزن کی کمائی 30,93,550 روپے ہوگئی۔ اس کے ساتھ انہوں نے ڈی پی ورلڈ انڈیا چیمپئن شپ میں بھی جگہ پکی کرلی۔

امر دیپ ملک نے آخری راؤنڈ میں 4 انڈر 66 کا کارڈ کھیل کر سخت مقابلہ کیا، لیکن 20 انڈر 260 کے مجموعی اسکور کے ساتھ دوسرے مقام پر رہے۔ چندی گڑھ کے اکشے شرما نے 10 انڈر 60 کا اسکور کرکے کورس ریکارڈ کی برابری کی اور 19 انڈر 261 کے ساتھ تیسرے مقام پر رہے۔ دہلی کے ہنی بیسویا بھی 19 انڈر 261 کے اسکور کے ساتھ مشترکہ طور پر تیسرے رہے۔

خطاب جیتنے کے بعد وشیش نے کہا کہ 19 سال کی عمر میں اپنے ہوم کورس پر پہلا پروفیشنل ٹائٹل جیتنا ان کے لیے انتہائی خاص ہے۔ انہوں نے اپنے والدین، بہن، کوچ سنجے سنگھ، حیدرآباد گالف ایسوسی ایشن، پی جی ٹی آئی عملے، اسپانسرز اور شائقین کا شکریہ ادا کیا، جنہوں نے فائنل راؤنڈ میں ان کی حوصلہ افزائی کی۔