انٹرمیڈیٹ تعلیم کو ختم نہ کریں، بلکہ اسے مضبوط بنائیں

حیدرآباد :  تلنگانہ رکشنا سینا کی صدر کلواکنٹلا کویتا نے جمعہ کے روز حکومت کی جانب سے انٹریمیڈیٹ تعلیم کو ختم کرنے کی تجویز کی شدید مخالفت کرتے ہوئے کہا کہ اس نظام نے تلنگانہ اور آندھرا پردیش سے انجینئرز اور دانشور پیدا کرنے میں اہم کردار ادا کیا ہے۔

انٹرمیڈیٹ ایجوکیشن جے اے سی کی جانب سے نامپلی میں منعقدہ ’سیو انٹر ایجوکیشن – جنگ سائرن‘ اجلاس سے خطاب کرتے ہوئے کویتا نے کہا کہ انٹرمیڈیٹ تعلیم کوئی ایسا مسئلہ نہیں ہے جسے ختم کرنے کی ضرورت ہو، بلکہ یہ ایک ایسا نظام ہے جسے مزید مضبوط کیا جانا چاہئے۔ انہوں نے خبردار کیا کہ اسے ختم کرنے سے طالبات شدید متاثر ہو سکتی ہیں اور اسکول/کالج چھوڑنے کی شرح میں اضافہ ہو سکتا ہے۔

کویتا نے وزیراعلیٰ اے ریونت ریڈی کے انجینئرنگ اور دیگر پیشہ ورانہ کورسز کے بجائے بلیو کالر (دستی کام کی) ملازمتوں کو فروغ دینے سے متعلق مبینہ بیانات پر تنقید کی۔ انہوں نے کہا کہ حکومتوں کو نوجوانوں بیرونِ ملک دستی ملازمتوں کی ترغیب دینے کے بجائے روزگار کے مواقع اور صنعت کار (انٹرپرینیورز) پیدا کرنے چاہئیں۔

انہوں نے چیف منسٹر ایجوکیشن کمیشن کی کارکردگی پر بھی سوال اٹھایا اور الزام لگایا کہ اس نے اپنی سفارشات پیش کرنے میں تین سال کا وقت لگایا۔ انہوں نے انٹرمیڈیٹ میں پاسنگ فیصد 45 فیصد کرنے اور فرسٹ ایئر کے امتحانات ختم کرنے جیسی تجاویز پر تنقید کی۔ انہوں نے مجوزہ "کے کے کمیشن” کے بارے میں وضاحت کا مطالبہ کیا اور پوچھا کہ اس کی رپورٹ کب پیش اور نافذ کی جائے گی۔

کویتا نے کہا کہ ریاست کے پاس مفت تعلیم اور صحت کی دیکھ بھال فراہم کرنے کی مالی صلاحیت موجود ہے، اور دلیل دی کہ اگر سیاسی خواہش ہو تو ریاست کی آمدنی کا ایک بڑا حصہ ان شعبوں کے لیے مختص کیا جا سکتا ہے۔

انہوں نے مطالبہ کیا کہ حکومت جاری اسمبلی اجلاس میں پختہ یقین دہانی کرائے کہ انٹرمیڈیٹ تعلیم کو ختم نہیں کیا جائے گا۔ انہوں نے خبردار کرتے ہوئے کہاکہ "ہم اس وقت تک اپنی جدوجہد جاری رکھیں گے جب تک حکومت یہ فیصلہ واپس نہیں لے لیتی۔” اور کہا کہ طلباء کے والدین ایسی کسی بھی پیشرفت کی مخالفت کریں گے جو ان کے بچوں کی تعلیم میں مشکلات پیدا کرے۔