تم مجرم ہو، نیتن یاہو کے خلاف اسرائیلی عوام سڑکوں پر
مظاہرین نے بعض مقامات پر راستے بند کر دیئے اور آگ لگا کر احتجاج کیا۔ مظاہرین کو منتشر کرنے کے لئے اسرائیلی پولیس نے طاقت کا استعمال کیا اور 6 مظاہرین کو حراست میں لے لیا ہے۔
تل ابیب: غزہ سے اسرائیلی مغویوں کی لاشیں ملنے کے بعد اسرائیل میں نیتن یاہو حکومت کے خلاف احتجاجی مظاہروں کا سلسلہ دوسرے روز بھی جاری ہے۔
غیر ملکی ذرائع ابلاغ کے مطابق اسرائیلی وزیر اعظم کے خلاف مظاہرے، مغربی القدس، تل ابیب، ہائفہ اور نیتن یاہو کی ذاتی رہائش گاہ کے علاقے کیسریا جیسے، متعدد مقامات پر کئے جارہے ہیں، جس میں مظاہرین کی بہت بڑی تعداد شریک ہے۔
ہزاروں اسرائیلی، غزّہ میں جنگ بندی اور قیدیوں کے تبادلے کے، سمجھوتے سے گریز کے باعث اسرائیلی وزیر اعظم کے خلاف احتجاج کررہے ہیں۔
احتجاجی مظاہرین کا کہنا ہے کہ غزہ میں اسرائیلی مغویوں کی موت کا ذمہ دار نیتن یاہو ہے، مظاہرین کی جانب سے ’گھر واپس لاؤ‘۔۔۔ فوراً ابھی، اصل کرتا دھرتا تم ہو۔۔۔ تم مجرم ہو۔۔جیسے نعروں کے ساتھ اسرائیلی قیدیوں کی فی الفور واپسی کا مطالبہ کیا جارہا ہے۔
مظاہرین نے بعض مقامات پر راستے بند کر دیئے اور آگ لگا کر احتجاج کیا۔ مظاہرین کو منتشر کرنے کے لئے اسرائیلی پولیس نے طاقت کا استعمال کیا اور 6 مظاہرین کو حراست میں لے لیا ہے۔
غزہ میں ہلاک ہونے والے 6اسرائیلی قیدیوں کی ہلاکت سے متعلق حماس کا کہنا ہے کہ اسرائیلی قیدی، امریکی اسلحے کے ساتھ اور فلسطینی عوام کو قتل کرنے کے لئے کی گئی بمباری میں مارے گئے ہیں۔
