کرناٹک انتخابات: نارائن مورتی ووٹ ڈالنے ہندوستان پہنچے

بنگلور: انفوسس کے شریک بانی نارائن مورتی اور ان کی اہلیہ سدھا مورتی نے آج صبح جیہ نگر کے پولنگ بوتھ پر کرناٹک اسمبلی انتخابات میں اپنا ووٹ ڈالا۔

ووٹنگ کے لئے تحریک کا نمونہ پیش کرتے ہوئے آج صبح وہ غیر ملکی سفر سے ہندوستان لوٹے اور ووٹ ڈالنے کے لیے پولنگ بوتھ پہنچے۔

مسٹر نارائن مورتی نے اپنا ووٹ ڈالنے کے بعد نامہ نگاروں سے کہا، یہ ہر شہری کا فرض ہے کہ وہ اس ذمہ داری کو بڑی احتیاط اور گہری سوچ کے ساتھ ادا کرے۔ میں بہت شکر گزار ہوں کہ مجھے یہ موقع ملا۔ میں آج صبح ہی بیرون ملک سے واپس آیا ہوں اور مجھے بہت خوشی ہے کہ مجھے ووٹ ڈالنے کا یہ موقع ملا”۔

مسٹر مورتی کو امید ہے کہ اس انتخاب کے ذریعے، بنگلور دیگر چیزوں کے ساتھ ساتھ رہائش اور حصول تعلیم کے لیے دنیا کے بہترین مقامات میں سے ایک کے طور پر ابھرے گا۔

انہوں نے کہا، "مجھے امید ہے کہ یہ جگہ میرے پوتے پوتیوں کے رہنے، کریئر بنانے، اپنی اعلی تعلیم حاصل کرنے اور معاشرے کی قدر بڑھانے کے لیے دنیا کی بہترین جگہوں میں شمار ہوگی۔”

انہوں نے مزید کہا کہ ” ہم سب امید کرتے ہیں کہ ہندوستان کے دور افتادہ گاؤں کے غریب ترین بچے کو اچھی تعلیم، اچھی صحت کی نگہداشت، اچھی تعلیم ملے گی اور یہ بھی امید ہے کہ ہمارے بچوں کے پوتے پوتیوں کا مستقبل ان سے بہتر ہوگا۔”