اردو مصنفین و شعراء کی 2022ء کی مطبوعات پر انعامات

حیدر آباد: محمد خواجہ مجیب الدین صدر تلنگانہ ریاستی اردو اکیڈیمی نے اپنے اعلامیہ میں کہا ہے کہ تلنگانہ ریاستی اردو اکیڈیمی کی جانب سے ریاست کے اردو شعراء، ادیبوں اور مصنفین کی سال 2022ء کے دوران شائع شدہ مطبوعات پر انعامات عطاء کئے جائیں گے۔

انہوں نے اس سلسلہ میں تفصیلات جاری کرتے ہوئے کہا کہ انعامات کے لئے مطبوعات کو شاعری، فکشن، طنز و مزاح، بچوں کا ادب، تحقیق و تنقید اور متفرق زمروں میں تقسیم کیا جائے گا۔ انہوں نے کہا کہ مطبوعات پر انعامات کے لئے درخواست گزار اپنی 5 مطبوعہ کتابیں درخواست اور تمام تفصیلات کے ساتھ 5 / اکتوبر تک صدر دفتر تلنگانہ ریاستی اردو اکیڈیمی چوتھی منزل، حج ہاؤز، نامپلی، حیدر آباد میں شخصی طور پر یا ذریعہ پوسٹ داخل کریں۔

محمد خواجہ مجیب الدین نے بتایا کہ مطبوعہ کتابیں ڈیمائی سائز کی کم از کم 95 صفحات پر اورکراؤن سائز کی کم از کم 112 صفحات پر مشتمل ہونی چاہیں۔

مؤلفہ و مرتبہ کتابوں میں ڈیمائی سائز کی مطبوعہ کتاب میں کم از کم 15 صفحات کا مقدمہ اور کراؤن سائز کتاب میں 20 صفحات کا مقدمہ شریک نہ ہوتو کتاب کو انعام کے لئے غور نہیں کیا جائے گا۔ انہوں نے بتایا کہ کتابوں کو انعام کے لئے منتخب یا مسترد کرنے کا اختیار تلنگانہ ریاستی اردو اکیڈیمی کو ہوگا۔

صدر اردو اکیڈیمی نے بتایا کہ اردو اکیڈیمی سے انعام یافتہ کتاب کو دوبارہ انعام نہیں دیا جائے گا۔ انہوں نے بتایا کہ درخواست کا پروفارما صدر دفتر تلنگانہ اسٹیٹ اردو اکیڈیمی چوتھی منزل، حج ہاؤز، نامپلی، حیدر آباد سے حاصل کیا جاسکتا ہے۔ صحافتی اعلامیہ میں بتایا گیا کہ پروفارما کی زیراکس کاپی بھی قابل قبول ہوگی۔