اپوزیشن کا ہنگامہ غیرضروری: غلام نبی آزاد

راجوری/ جموں: صدر ڈی پی اے پی غلام نبی آزاد نے ہفتہ کے دن کہا کہ عوام کو نئی پارلیمنٹ کا افتتاح صدرجمہوریہ کے ہاتھوں ہوتا ہے یا وزیراعظم کے ہاتھوں اس سے زیادہ فکر مہنگائی اور بے روزگاری جیسے مسائل کی ہے۔

انہوں نے اپوزیشن پر غیرضروری ہنگامہ برپا کرنے کا الزام عائد کیا۔ غلام نبی آزاد نے پی ٹی آئی سے کہا کہ مجھے پارلیمنٹ کی افتتاحی تقریب کا بائیکاٹ کرنے کے اپوزیشن کے فیصلہ پر حیرت ہے۔

عوام سے جڑے سینکڑوں مسائل ہیں لیکن ان پر آواز نہیں اٹھائی جارہی ہے‘ جس مسئلہ پر آواز اٹھائی جارہی ہے وہ عوام سے جڑا نہیں ہے۔

ڈیموکریٹک پروگریسیو آزاد پارٹی کے سربراہ نے کہا کہ نئی عمارت کا افتتاح صدرجمہوریہ کریں یا وزیراعظم اس سے عوام کی صحت پر کیا فرق پڑے گا۔

انہوں نے کہا کہ وزیراعظم نے نئی پارلیمنٹ بلڈنگ کا سنگ بنیاد رکھاتھا‘ اگراس کا افتتاح بھی وہی کرتے ہیں تو ہمیں کیا لینا دینا۔ اپوزیشن کے بجائے راشٹرپتی یا پردھان منتری کو اس کا فیصلہ کرنا چاہئے۔

غلام نبی آزاد نے اپوزیشن پر طنز کرتے ہوئے کہا کہ ریاستوں میں گورنروں کے بجائے چیف منسٹرس افتتاح کررہے ہیں۔ نئی پارلیمنٹ کے افتتاح کے مسئلہ پر جو لوگ متحد ہوئے ہیں دیکھئے ان لوگوں کا گورنروں سے سلوک کیسا ہے۔