نظام آباد میں سڑک حادثہ۔چارنوجوان ہلاک
یہ حادثہ ضلع کے عندالوائی منڈل کی چندرائن پلی میں 44نمبر کی قومی شاہراہ پر کل شب اُس وقت پیش آیا جب حیدرآباد سے جانے والی کاربے قابوہوگئی اور یہ کار، ٹہرے ہوئے کنٹینر سے ٹکراگئی۔
حیدرآباد: نظام آباد میں پیش آئے سڑک حادثہ میں چار نوجوان ہلاک ہوگئے۔یہ حادثہ ضلع کے عندالوائی منڈل کی چندرائن پلی میں 44نمبر کی قومی شاہراہ پر کل شب اُس وقت پیش آیا جب حیدرآباد سے جانے والی کاربے قابوہوگئی اور یہ کار، ٹہرے ہوئے کنٹینر سے ٹکراگئی۔
حادثہ اتنا شدیدتھاکہ کارمیں سوار چار نوجوان موقع پر ہی ہلاک ہوگئے اور کار کو شدید نقصان پہنچا۔تیز رفتاری حادثہ کا سبب سمجھی جارہی ہے۔مہلوکین، موبائل فون کے سامان کا ہول سیل بزنس کرتے تھے۔
یہ نوجوان‘ حیدرآباد میں کام ختم کرنے کے بعد واپس ہورہے تھے۔اطلاع ملتے ہی پولیس وہاں پہنچی جس نے لاشوں کو کافی جدوجہد کے بعد کار سے نکالتے ہوئے سرکاری اسپتال پوسٹ مارٹم کیلئے بھیجنے میں کامیابی حاصل کی۔
حادثہ کا مقام دلخراش منظرپیش کررہا تھا۔ اے سی پی کرن کمار نے مقام حادثہ کا معائنہ کیا۔ اس کار میں گنیش، اس کا بھائی آدتیہ،اس کا دوست پرکاش سوار تھے۔
ان کا تعلق چندر شیکھرکالونی سے ہے۔ایک اور نوجوان کی شناخت نہیں ہوسکی۔پرکاش کی شادی 2مئی کو مقررتھی جبکہ گنیش کی اہلیہ 9ماہ کی حاملہ ہے۔گنیش، آدتیہ کا ایک ہی خاندان سے تعلق ہے۔مہلوکین کا تعلق پڑوسی ریاست مہاراشٹر کے بلولی مقام سے ہے تاہم یہ افراد کچھ عرصہ سے نظام آباد میں مقیم تھے۔
