وائٹ ہاؤز کے بیان کی مذمت، امریکی مسلمانوں کی تنظیم کا شدید ردِ عمل

واشنگٹن: امریکہ میں مسلمانوں کی سب سے بڑی سیول سوسائٹی کی تنظیم کونسل آن امریکن اسلامک ریلیشنس (سی اے آئی آر) نے وائٹ ہاؤز کے اس بیان کی جس میں کہا گیا ہے کہ غزہ سے متعلق کوئی سرخ لکیر نہیں ہے‘کی شدید مذمت کی ہے۔

سی اے آئی آر کے تحریری بیان میں وائٹ ہاؤز کی قومی سلامتی کونسل کے اسٹراٹیجک کمیونیکیشن ڈائرکٹر جان کربی کے بیانات پر رد عمل ظاہر کیا گیا ہے۔

بیان میں کہا گیا ہے کہ ”ہم کربی کے اس بیان کی ایک بار پھر شدید مذمت کرتے ہیں جس میں انہوں نے کہا ہے کہ اسرائیلی وزیر اعظم بنجامن نتن یاہو کے پاس شہریوں کے خلاف نسل کشی کے حملوں کو روکنے سے متعلق کوئی سرخ لکیر نہیں ہے“۔

سی اے آئی آر گورنمنٹ افیرس کے ڈائرکٹر رابرٹ میکاؤ نے بھی اپنے تحریری بیان میں کہا کہ ”ہمارے پاس ریڈ لائن نہیں ہے“ جیسا کوئی بھی بیان اسرائیل کو شہریوں کو نشانہ بنانے پر اکساتا ہے۔

انہوں نے کہا کہ اسرائیل نے امریکیوں کے ٹیکسوں اور حمایت سے ”جنگی جرم کا ارتکاب کیا“ میکاؤ نے کہا ”ہم کربی سے مطالبہ کرتے ہیں جو یوکرین کے شہریوں کے بارے میں بات کرتے ہوئے تقریباً رو پڑے تھے، کہ وہ یہ سمجھیں کہ فلسطینی بھی انسان ہیں اور سفید فاموں کی مدد کرنا اور بنجامن نتن یاہو کی نسل کشی کی کوششوں کی حمایت کرنا چھوڑ دیں۔

حماس کے عسکری وِنگ القسام بریگیڈس نے 7 اکتوبر کو اسرائیل پر ”طوفانِ اقصیٰ“ کے نام سے ایک بڑا حملہ کیا تھا۔ اس کے جواب میں اسرائیلی فوج کے جنگی طیاروں نے غزہ پٹی کے خلاف آپریشن شروع کررکھا ہے۔بڑھتی ہوئی کشیدگی میں دونوں طرف سے ہزاروں ہلاکتیں ہوئی ہیں۔