ہماری حکومت سنگباری برداشت نہیں کرے گی: سدارامیا
چیف منسٹر سدارامیا نے کہا کہ شیوموگہ شہر میں سنگباری کے واقعہ کے سلسلے میں 40 سے زائد افراد کو گرفتار کیا گیا ہے۔
بنگلورو: چیف منسٹر سدارامیا نے کہا کہ شیوموگہ شہر میں سنگباری کے واقعہ کے سلسلے میں 40 سے زائد افراد کو گرفتار کیا گیا ہے۔
انہوں نے شیوموگہ شہر کو پُرامن قرار دیتے ہوئے کہا کہ ان کی حکومت سنگباری کے واقعات کوبرداشت نہیں کرے گی۔
بنگلورو میں صحافیوں سے بات کرتے ہوئے سدارامیا نے کہا کہ تشدد اور سنگباری میں ملوث 40سے زائد شرپسندوں کو گرفتار کرلیا گیا۔ ہم ان کے خلاف مقدمات درج کررہے ہیں کیو ں کہ جلوس کے دوران سنگباری کرنا خلاف قانون ہے۔
ہماری حکومت ایسی سرگرمیوں کو برداشت نہیں کرے گی اور ان کو قابو میں کیا جائے گا۔ انہو ں نے کہا کہ شیوموگہ شہر میں اب حالات مکمل طو رپر پُرامن ہیں۔ پولیس وہاں ہر ممکن قدم اٹھارہی ہے۔
سنگباری کے واقعہ کے بعد شہر میں امن قائم کردیا گیا۔ ہم شیوموگہ میں قیام امن کے لے ہر ممکن قدم اٹھائیں گے۔انہوں نے کہا کہ شیوموگہ میں میلاد جلوس کے دوران شرپسندوں نے راگی گڈا علاقہ میں سنگباری کی تھی۔ پولیس پر بھی پتھر پھینکے گئے اور اسے لاٹھی چارج کرنا پڑا۔
