مسجد نبویؐ میں ایک ہفتہ میں 57لاکھ زائرین کی آمد

مدینہ منورہ: سعودی عرب میں حرمین شریفین انتظامیہ کی جانب سے مسجد نبوی ؐ میں ایک ہفتہ کے دوران آنے والے زائرین کے اعدادو شمار جاری کئے گئے ہیں۔

سعودی خبر رساں ادارے کی رپورٹ کے مطابق حرمین شریفین انتظامیہ نے بتایا کہ ایک ہفتے کے دوران مسجد نبویؐ کا 57 لاکھ 35 ہزار 16 افراد نے دورہ کیا، پانچ لاکھ 27 ہزار152 زائرین نے روضہ رسول ؐ پر حاضری دی۔

اس سے قبل ایک بیان میں سعودی عرب میں مقدس مساجد کے امور کی جنرل اتھارٹی کا کہنا تھا کہ مسجد نبویؐ 1445ھ میں ایک سال کے دوران 281 ملین زائرین اور نمازیوں نے حاضری دی، جو گزشتہ ھجری سال کے مقابلے میں 25 ملین زیادہ ہیں ’۔

مسجد نبویؐ میں 11 ملین افراد نے نماز ادا کی اور روضہ رسول ؐ پر نذرانہ عقیدت پیش کیا۔ پچھلے سال کے مقابلہ میں یہ تعداد 1.8 ملین زیادہ ہے۔

روضہ شریفہ کا رقبہ 330 مربع میٹر ہے جس میں فی گھنٹہ 800 افراد کی گنجائش ہے۔ اوسطا ہر آنے والوں کو 10منٹ کا وقت دیا جاتا ہے۔