آندھراپردیش میں سڑک حادثہ، 6 افراد ہلاک

کاکیناڈا: آندھرا پردیش میں کاکیناڈا سے 25 کلومیٹر دور تھالاریو بائی پاس روڈ کے نزدیک اتوار کو ایک بس آٹورکشہ سے ٹکرا جانے سے چھ افراد ہلاک اور تین دیگر زخمی ہو گئے۔پولیس نے بتایا کہ آٹورکشا بھرا ہوا تھا اور اس میں سوار افراد یانم کے نزدیک نیلاپلی گاؤں کے مزدور تھے، جن میں زیادہ تر خواتین تھیں۔

حادثہ اس وقت پیش آیا جب آٹورکشہ میں سوار افراد کاکیناڈا کے نزدیک جھینگوں کی پروسیسنگ فیکٹری میں کام کرنے جارہے تھے۔ نجی بس سے خوفناک تصادم میں 6 افراد موقع پر ہی ہلاک اور 3 زخمی ہوگئے۔

زخمیوں میں سے ایک کی حالت تشویشناک بتائی جاتی ہے۔ زخمیوں کو یہاں کے سرکاری جنرل اسپتال (جی جی ایچ) میں داخل کرایا گیا ہے ۔تصادم اتنا زوردار تھا کہ آٹو رکشا بری طرح تباہ ہوگیا اور لاشیں سڑک پر بکھر گئیں۔