تلنگانہ کے کئی علاقوں میں درجہ حرارت میں گراوٹ

حیدرآباد: شہرحیدرآباد کے بعض علاقوں اورتلنگانہ کے کئی علاقوں میں تقریباً 10 دنوں کے بعد اقل ترین درجہ حرارت واحد عدد تک پنچ گیا۔

اتوار کی شام اور پیر کی صبح کے درمیان اقل ترین درجہ حرارت شہر کے مضافات میں معین آباد میں 9.4 ڈگری سیلسیس درج کیاگیا جبکہ اضلاع آصف آباد، عادل آباد، سنگاریڈی اور نرمل کے کئی مقامات پر درجہ حرارت 6.5 ڈگری سیلسیس اور 9 ڈگری سیلسیس کے درمیان رہا۔

ہندوستانی محکمہ موسمیات حیدرآباد نے پیش قیاسی کی ہے کہ آئندہ 3 دنوں کے دوران نرمل، عادل آباد اور منچریال اضلاع کے مختلف علاقوں میں اقل ترین درجہ حرارت 5 ڈگری سیلسیس اور 10 ڈگری سیلسیس کے درمیان رہے گا۔

محکمہ موسمیات نے انتباہ دیا کہ آئندہ 3 دنوں تک تلنگانہ کے بعض علاقوں میں صبح کے اوقات میں کہر کا امکان ہے۔