ہولی کے جشن کے دوران راجہ پور میں مسجد پر ہجوم کا حملہ۔ گیٹ کو تباہ کردیاگیا۔پولیس خاموش تماشائی بنی رہی

نئی دہلی: مہاراشٹرا کے ضلع رتناگری میں ہولی منانے کے دوران راجہ پور ٹاون میں جامع مسجد پر ایک بڑے ہجوم کے حملے کا ویڈیو وائرل ہوگیاہے جس کی وجہ سے سوشیل میڈیا پر برہمی پھیل گئی ہے۔

راجہ پور کے مولانا لقمان نے چہارشنبہ کی رات مسجد پر حملہ کئے جانے کی توثیق کی۔ انہوں نے کلیرین انڈیا کو فون پر بتایاکہ جب مسلمان مسجد کے اندر نماز تراویح ادا کررہے تھے تو غنڈؤں نے مسجد پر حملہ کردیا۔ ہجوم ہولی کی ابتدائی رسومات کررہاتھا اور پورے علاقہ میں ایک ستون جیسی شئے لے کر گھوم رہاتھا۔جب وہ لوگ مسجد کے پاس پہنچے تو اندر داخل ہونے کی کوشش کی۔

وہ لوگ فرقہ وارانہ کشیدگی پیدا کرنے کی اس ستون کو اندر لانے کی کوشش کررہے تھے۔ قبل ازیں اس علاقہ کے عوام پولیس سے رجوع ہوئے تھے اور مسجد کا تحفظ کرنے کی درخواست کی تھی لیکن صرف چند پولیس ملازمین کو تعینات کیاگیا جو ہجوم کو نہیں سنبھال سکے۔

اس واقعہ نے ٹاون میں ماحول کو کشیدہ کردیا ہے۔ ایک ایف آئی آر درج کرلی گئی ہے۔ وائرل ویڈیو میں ہولی منانے والوں کو مسجد کے قریب شور و غل اور نعرہ بازی کرتے ہوئے دیکھا جاسکتاہے۔ ان میں سے چند مسجد کے اندر گھسنے کی کوشش کررہے تھے لیکن واپس ڈھکیلا جارہاتھا۔ کچھ دیر بعد جئے شری رام کے نعرے لگانے والے چند افراد نے مسجد کی گیٹ کے اندر ستون نما شئے ڈھکیلنے کی کوشش شروع کردی۔

تین کوششوں کے بعد وہ لوگ گیٹ میں اندر گھسنے میں کامیاب ہوگئے۔ اس ویڈیو میں دیکھاجاسکتاہے کہ پولیس ملازمین خاموش تماشائی بنے رہے جبکہ ہجوم‘ نے توڑپھوڑ مچادی اور مسجد کی گیٹ کو نقصان پہنچایا۔ ایک غیر سرکاری تنظیم ممبئی برادر ہوڈ فاونڈیشن نے مجرموں کے خلاف حکومت سے سخت کارروائی کرنے کامطالبہ کیا تنظیم نے حکام سے اپیل کی کہ وہ ہولی کے جشن کے دوران مسجد کو مناسب تحفظ فراہم کرے۔

سوشیل میڈیا صارفین نے اشرار کو امن و امان درہم برہم کرنے کی اجازت دینے پر دیویندر پھڈنویس حکومت پر تنقید کی۔ انڈین نیشنل کانگریس کی رکن پریم واڑہ نے ایکس پر کہا کہ مہاراشٹرا تیزی سے اترپردیش بنتا جارہاہے جہاں چیف منسٹر پھڈ نویس چیف منسٹر اور وزیر داخلہ ہیں۔

بی جے پی حکومت فرقہ وارانہ سیاست پر چلتی ہے۔ راجہ پور‘ کونکن کاانتہائی پرامن ٹاون ہے۔ ہندو اور مسلمان ہمیشہ ساتھ ساتھ رہے ہیں لیکن اس مقام سے جونیر رانے منتخب ہوئے او ر اب وہ کابینی وزیر ہیں‘ جس کے بعد پرامن ٹاون میں فرقہ وارانہ تشدد تباہی مچانے لگاہے۔ امن و امان کی بحالی کے لیے ہمیں نئی حکومت کی ضرورت ہے۔ بی جے پی مہاراشٹرا کو تباہ کردے گی۔