ووٹ نہ دینے پر خودکشی کرنے کی دھمکی دینے والے کیخلاف کارروائی کی جانی چاہئے:گورنرتلنگانہ

حیدرآباد: گورنر تلنگانہ تمیلی سائی سوندراراجن نے تلنگانہ کی اصل اپوزیشن جماعت بی آرایس کے رکن اسمبلی پدی کوشک ریڈی پر بالواسطہ طورپر تنقید کی۔

انہوں نے آج نیشنل ووٹرس ڈے کے موقع پر حیدرآباد کے جے این ٹی یوآڈیٹوریم میں منعقدہ تقریب سے خطاب کرتے ہوئے ریاست میں حال ہی میں ہوئے اسمبلی انتخابات کا حوالہ دیتے ہوئے کہاکہ ایک امیدوار نے دھمکی دی تھی کہ اگر عوام اس کو ووٹ نہیں دیں گے تووہ خودکشی کرلے گا۔

ایسے امیدواروں کے خلاف الیکشن کمیشن کو کارروائی کرنی چاہئے۔ انہوں نے مشورہ دیا کہ کوئی بھی رائے دہندوں پر زبردستی نہ کرے۔

انہوں نے کہاکہ جمہوریت کو زندہ رکھنے کے لیے اچھے امیدوار کو ووٹ دینا چاہئے۔واضح رہے کہ حضورآباد کے بی آرایس امیدوار کوشک ریڈی نے انتخابات کی مہم کے دوران عوام سے جذباتی اپیل کرتے ہوئے کہا تھا کہ ان کو اگر عوام نے ووٹ نہیں دیا تو وہ خودکشی کرلیں گے۔کملاپورپولیس نے ان کے خلاف ایف آئی آردرج کی تھی۔