دہلی-این سی آر میں ہوا کے معیار میں راحت، درجہ حرارت میں معمول سے زیادہ اضافہ

نئی دہلی: گزشتہ چند دنوں سے دہلی-این سی آر میں چلنے والی تیز ہواؤں کے باعث فضائی آلودگی میں نمایاں کمی دیکھنے میں آئی ہے، جس سے شہریوں کو خاصی راحت ملی ہے۔ ایئر کوالٹی انڈیکس میں قابلِ ذکر گراوٹ ریکارڈ کی گئی ہے۔

قومی دارالحکومت میں زیادہ سے زیادہ درجہ حرارت تقریباً 31 ڈگری سیلسیس رہنے کا امکان ہے۔

ادھر ہندستانی محکمہ موسمیات (آئی ایم ڈی) کے مطابق آئندہ ایک ہفتے کے دوران شمال مغربی ہندوستان کے بیشتر علاقوں میں زیادہ سے زیادہ درجہ حرارت معمول سے 3 سے 5 ڈگری سیلسیس زیادہ رہنے کی توقع ہے۔

آئی ایم ڈی نے پیش گوئی کی ہے کہ اگلے سات دنوں میں شمال مغربی ہندوستان کے میدانی علاقوں میں زیادہ سے زیادہ درجہ حرارت میں بتدریج 2 سے 4 ڈگری سیلسیس اضافہ ہوگا، جس کے نتیجے میں دن کا درجہ حرارت موسمی اوسط سے بلند رہے گا۔

وسطی ہندوستان میں آئندہ سات دنوں کے دوران زیادہ سے زیادہ درجہ حرارت میں 3 سے 5 ڈگری سیلسیس تک اضافہ متوقع ہے۔ مہاراشٹر میں اگلے پانچ دنوں کے دوران 3 سے 4 ڈگری سیلسیس اضافہ ہو سکتا ہے، جس کے بعد کوئی خاص تبدیلی متوقع نہیں۔

گجرات میں آئندہ تین دنوں کے دوران درجہ حرارت میں تقریباً 2 ڈگری کمی آسکتی ہے، تاہم اس کے بعد اگلے چار دنوں میں 3 سے 5 ڈگری سیلسیس تک تدریجی اضافہ متوقع ہے۔

مشرقی ہندوستان میں اگلے دو دنوں تک درجہ حرارت میں کوئی نمایاں تبدیلی کا امکان نہیں، تاہم اس کے بعد پانچ دنوں میں 2 سے 4 ڈگری سیلسیس اضافہ ہو سکتا ہے۔

آئی ایم ڈی کے مطابق ہفتے کے اختتام تک مغربی، وسطی، مشرقی اور شمالی جزیرہ نما ہندوستان کے کئی علاقوں میں زیادہ سے زیادہ درجہ حرارت معمول سے 2 سے 4 ڈگری سیلسیس زیادہ رہنے کا امکان ہے۔

ملک کے دیگر حصوں میں زیادہ سے زیادہ درجہ حرارت میں کوئی بڑی تبدیلی متوقع نہیں ہے۔