ایس آئی آر کے دوران کسی اہل ووٹر کا نام حذف نہ ہو، اکبرالدین اویسی کا حکومت کو مشورہ

حیدرآباد: تلنگانہ میں اسپیشل انٹینسیو ریویژن (ایس آئی آر) کی تیاریوں کے درمیان مجلس اتحادالمسلمین کے اسمبلی قائدِ ایوان اکبرالدین اویسی نے حکومت اور الیکشن حکام کو اہم مشورہ دیا ہے۔ انہوں نے کہا کہ ایس آئی آر کے عمل کے دوران اس بات کو یقینی بنایا جانا چاہیے کہ کوئی بھی اہل ووٹر اپنے حقِ رائے دہی سے محروم نہ ہو۔ ان کے مطابق ووٹر لسٹ کی نظرثانی کا مقصد فہرست کو درست اور شفاف بنانا ہوتا ہے، نہ کہ بڑی تعداد میں اہل ووٹروں کے نام فہرست سے خارج کرنا۔

اکبرالدین اویسی نے دیگر ریاستوں کا حوالہ دیتے ہوئے کہا کہ بہار اور چند دوسری ریاستوں میں ایس آئی آر کے دوران شکایات سامنے آئی ہیں کہ بغیر مناسب جانچ اور پیشگی اطلاع کے ووٹروں کے نام فہرست سے ہٹا دیے گئے، جو جمہوری نظام کے لیے خطرناک رجحان ہے۔ انہوں نے کہا کہ چونکہ تلنگانہ میں ایس آئی آر کی تیاریاں زوروں پر ہیں، اس لیے حکومت کو پہلے ہی واضح ہدایات جاری کرنی چاہئیے تاکہ ووٹر لسٹ کی جانچ منصفانہ اور شفاف طریقے سے ہو۔

انہوں نے خاص طور پر غریب، مزدور طبقہ، اقلیتی برادری اور بار بار نقل مکانی کرنے والے افراد کا ذکر کرتے ہوئے کہا کہ ان کے نام ووٹر لسٹ سے خارج ہونے کا خطرہ زیادہ ہوتا ہے، اس لیے ان طبقات پر خصوصی توجہ دی جانی چاہیے۔ اویسی نے مطالبہ کیا کہ ایس آئی آر کے دوران عوام کو مکمل جانکاری فراہم کی جائے، بوتھ لیول عہدیداران کی مناسب تربیت کی جائے اور اگر کسی ووٹر کا نام غلطی سے حذف ہو جائے تو اسے آسان اور تیز طریقے سے دوبارہ شامل کرنے کا موقع دیا جائے۔

آخر میں انہوں نے زور دیا کہ ووٹ کا حق ہر شہری کا بنیادی حق ہے اور اس کے ساتھ کسی بھی صورت میں سمجھوتہ نہیں کیا جانا چاہیے۔ انہوں نے کہا کہ حکومت اور الیکشن کمیشن کی ذمہ داری ہے کہ وہ عوام کے اعتماد کو برقرار رکھیں اور ایس آئی آر کے عمل کو اس طرح انجام دیں کہ ہر اہل ووٹر بلا خوف و فکر اپنے حقِ رائے دہی کا استعمال کر سکے۔