ہوم ورک نہ کرنے پر استاد کی مبینہ پٹائی، دسویں جماعت کے طالب علم کی خودکشی

سدی پیٹ: تلنگانہ کے ضلع سدی پیٹ کے ورگل منڈل میں واقع بی سی ہاسٹل میں ایک افسوسناک واقعہ پیش آیا، جہاں استاد کی مبینہ پٹائی سے دلبرداشتہ ہوکر دسویں جماعت کے 15 سالہ طالب علم رام چرن نے خودکشی کرلی۔

متوفی کی شناخت رام چرن کی حیثیت سے ہوئی ہے، جو مارکوک منڈل کے موضع پوتھور کا رہنے والا تھا۔ وہ ورگل منڈل کے مرکز میں واقع بی سی ہاسٹل میں رہتے ہوئے دسویں جماعت کی تعلیم حاصل کر رہا تھا۔

اطلاعات کے مطابق، رام چرن نے اپنے والد کو فون کرکے بتایا تھا کہ ہوم ورک مکمل نہ کرنے پر اسکول میں استاد نے اس کی پٹائی کی ہے۔ اس نے والد سے یہ بھی کہا کہ اب وہ ہاسٹل میں نہیں رہ سکتا۔

بتایا جاتا ہے کہ اس واقعہ کے بعد جب ہاسٹل میں کوئی موجود نہیں تھا، تو رام چرن نے مبینہ طور پر پھانسی لے کر اپنی جان دے دی۔

واقعہ کا علم ہونے پر ہاسٹل کے عملے نے طالب علم کی لاش کو گجویل کے سرکاری اسپتال منتقل کیا۔

اس افسوسناک واقعہ سے طالب علم کے افراد خاندان اور مقامی حلقوں میں غم کی لہر دوڑ گئی۔ واقعہ نے رہائشی تعلیمی اداروں میں طلبہ کے ساتھ برتاؤ اور ان کی ذہنی کیفیت کے حوالے سے بھی تشویش پیدا کردی ہے۔

پولیس کی جانب سے واقعہ کی وجوہات اور استاد کے خلاف عائد الزامات کی تحقیقات سے متعلق مزید تفصیلات کا انتظار ہے۔