تلنگانہ کے ایلکاترتی میں غیر معمولی واقعہ۔بعض افراد 2ہزاردیسی مرغیاں چھوڑکر فرار

حیدرآباد: تلنگانہ کے ضلع ہنمکنڈہ کے ایلکا ترتی میں ایک غیر معمولی واقعہ پیش آیا جہاں تقریباً 2 ہزار دیسی مرغیاں نامعلوم افراد نے چھوڑ کر فرار ہو گئے۔ یہ مرغیاں سدی پیٹ۔ایلکاترتی روڈ کے کنارے کھیتوں میں چھوڑ دی گئیں، جس کے باعث مقامی افرادانہیں پکڑنے کے لئے دوڑ پڑے۔

لوگ مرغیوں کو پکڑ کر اپنے گھروں میں لے گئے، تاہم یہ واضح نہیں ہو سکا کہ اتنی بڑی تعداد میں مرغیاں چھوڑنے والے کون تھے اور کیوں یہ اقدام کیا گیا۔

مقامی کسانوں کا خیال تھا کہ نامعلوم افراد نے یہ دیسی مرغیاں چھوڑیں۔ کھیتوں میں پائی جانے والی سینکڑوں مرغیوں کو مقامی کسانوں نے اپنے گھروں میں منتقل کر دیا۔

کچھ کسانوں نے خدشہ ظاہر کیا کہ مرغیوں میں وائرس ہو سکتا ہے اور اس بارے میں حکام کو اطلاع دی۔ فوری طور پر وہاں پہنچنے والے ویٹرنری آفیسرس نے چند مرغیوں کو ورنگل لیبارٹری بھیجا تاکہ جانچ کی جا سکے۔ حکام نے تصدیق کی کہ مرغیوں میں کسی قسم کی بیماری یا وائرس کے کوئی آثار نہیں پائے گئے۔

یہ واقعہ مقامی افرادمیں حیرت اور تجسس کا سبب بنا ہے کہ اتنی بڑی تعداد میں دیسی مرغیاں چھوڑنے کا مقصد کیا تھا۔