آندھرا پردیش SSC نتائج: کاکینادا کی نہانجنی نے پہلی بار 600 میں سے 600 نمبر حاصل کیے

امراؤتی: آندھرا پردیش میں دسویں جماعت کے نتائج جاری ہو گئے ہیں اور کاکینادا کی طالبہ نہانجنی نے ایک نیا ریکارڈ قائم کیا ہے۔ بھاشیم اسکول کی طالبہ نہانجنی نے 600 میں سے 600 نمبر حاصل کر کے ریاست کی تعلیمی تاریخ میں ایک منفرد مقام حاصل کیا ہے۔ یہ پہلا موقع ہے جب کسی طالبعلم نے پورے 600 نمبر حاصل کیے ہوں۔

نہانجنی کی اس شاندار کامیابی پر والدین، رشتہ دار اور اسکول انتظامیہ نے خوشی کا اظہار کرتے ہوئے انہیں مبارکباد پیش کی۔ سوشل میڈیا پر بھی نہانجنی کے تعلیمی کارنامے کو خوب سراہا جا رہا ہے۔

81.14 فیصد طلبہ کامیاب

ریاستی وزیر تعلیم نارا لوکیش کے مطابق اس سال آندھرا پردیش میں دسویں جماعت کے امتحانات میں کل 6,14,459 طلبہ شریک ہوئے، جن میں سے 4,98,585 طلبہ کامیاب قرار دیے گئے۔ کامیابی کی شرح 81.14 فیصد رہی۔

اضلاع کی کارکردگی

• پروتھی پورم منیم ضلع نے سب سے بہترین کارکردگی دکھائی، جہاں کامیابی کی شرح 93.90 فیصد رہی۔
• دوسری جانب الوری سیتا راما راجو ضلع میں سب سے کم کامیابی کی شرح دیکھی گئی۔

لڑکیاں بازی لے گئیں

• لڑکیوں کی کامیابی کی شرح 84.09 فیصد رہی، جب کہ لڑکوں کی کامیابی 78.31 فیصد رہی، جس سے ظاہر ہوتا ہے کہ لڑکیاں تعلیمی میدان میں آگے ہیں۔

ضمنی امتحانات کی تاریخ

ان طلبہ کے لیے جو اس بار کامیاب نہیں ہو سکے، دسویں جماعت کے ضمنی امتحانات 19 مئی سے 28 مئی کے درمیان منعقد کیے جائیں گے۔