آتشی دہلی کی تیسری خاتون چیف منسٹر بنیں گی

نئی دہلی: عام آدمی پارٹی (آپ) کی سینئر لیڈر اور دہلی حکومت میں کابینہ کی وزیر آتشی دہلی کی تیسری خاتون وزیر اعلیٰ بنیں گی۔ اس سے پہلے سشما سوراج اور شیلا دیکشت دہلی کے وزیر اعلی کے عہدے پر فائز رہ چکی ہیں۔

آتشی 8 جون 1981 کو دہلی میں پیدا ہوئیں۔ وہ اصل میں دہلی کی رہنے والی ہیں ۔ ان کے والدین دونوں دہلی یونیورسٹی میں پروفیسر رہ چکے ہیں۔ آتشی نے سینٹ اسٹیفن کالج سے تاریخ میں بی اے کی ڈگری حاصل کی ہے۔ انہوں نے آکسفورڈ یونیورسٹی سے ماسٹرز کی ڈگری حاصل کی ہے۔

محترمہ آتشی نے 2012 میں انسداد بدعنوانی انا تحریک کے دوران سیاست میں قدم رکھا تھا اور وہ ان لوگوں میں شامل تھیں، جنہوں نے عام آدمی پارٹی کی بنیاد رکھی تھی۔ آتشی نے جولائی 2015 سے 17 اپریل 2018 تک اس وقت کے وزیر تعلیم منیش سسودیا کی مشیر کے طور پر کام کیا۔

2013 کے اسمبلی انتخابات کے دوران، وہ پارٹی کا منشور تیار کرنے والی ڈرافٹنگ کمیٹی کی اہم رکن تھیں۔ وہ پارٹی کی ترجمان کے طور پر بھی کام کر چکی ہیں، وہ 2020 میں کالکاجی اسمبلی سے جیت کر پہلی بار ممبر اسمبلی بنی ہیں۔

جب آپ لیڈر منیش سسودیا کو مبینہ شراب گھوٹالہ کے الزام میں جیل جانا پڑا تو ان کی جگہ آتشی کو وزیر تعلیم بنایا گیا اور اب ان کے پاس وزارت تعلیم سمیت کئی وزارتوں کی ذمہ داری ہے۔ محترمہ آتشی کو دہلی کے وزیر اعلی اروند کیجریوال کا قریبی سمجھا جاتا ہے۔

محترمہ آتشی کو 2019 میں مشرقی دہلی سے لوک سبھا کا ٹکٹ دیا گیا تھا۔ حالانکہ انہیں شکست کا سامنا کرنا پڑا تھا، لیکن وہ اگلے ہی سال اسمبلی انتخابات میں میدان میں اتری تھیں اور کالکاجی سے ایم ایل اے منتخب ہوئی تھیں۔

آتشی سے پہلے محرمہ سشما سوراج چند ماہ تک وزیر اعلیٰ رہ چکی ہیں اور محترمہ شیلا دیکشت تقریباً 15 سال تک وزیراعلی کے عہدے پر فائز رہ چکی ہیں۔