بنگلہ دیش میں ہندووں پرحملے،تلنگانہ کے نلگنڈہ ضلع میں وی ایچ پی کا احتجاج

حیدرآباد: بنگلہ دیش میں ہندوؤں پر ہونے والے مبینہ مظالم اور حملوں کے خلاف وشوا ہندو پریشد کی تلنگانہ کمیٹی کی اپیل پرضلع نلگنڈہ میں وی ایچ پی اور بجرنگ دل کے زیر اہتمام ایک بڑا احتجاجی مارچ نکالاگیا۔

مقامی رام مندر سے کلاک ٹاور سنٹر تک نکالی گئی اس ریلی میں سیاسی وابستگیوں سے بالاتر ہو کر کارکنوں کی بڑی تعداد نے شرکت کی۔ شرکاء نے بنگلہ دیشی حکومت اور وہاں موجود شر پسند عناصر کے خلاف شدید نعرے بازی کی۔

ریلی کے بعد کلاک ٹاور سنٹر پر دھرنا دیا گیا جہاں خطاب کرتے ہوئے وشوا ہندو پریشد کے ضلع صدر اوماکر ریڈی نے مطالبہ کیا کہ بنگلہ دیش میں اقلیتی ہندو برادری پر ہونے والے روزانہ کے حملوں اور مظالم کو روکنے حکومتوں کو فوری اور سخت اقدامات کرنے چاہئیں۔

انہوں نے الزام لگایا کہ خود ملک کی بعض ریاستوں میں بھی جہاں ہندو اقلیت میں ہیں انہیں اسی طرح کے چیلنجس کا سامنا ہے۔ مظاہرین نے بین الاقوامی برادری سے بھی اس معاملہ میں مداخلت کی اپیل کی۔