خاتون کے گلے سے طلائی چین چھیننے کی کوشش، چور کی پٹائی

حیدرآباد: خاتون کے گلے سے طلائی چین چھیننے کی کوشش کرنے والے شخص کو پکڑ کر اس کی پٹائی کردی گئی۔

یہ واقعہ شہرحیدرآباد کے کوکٹ پلی پولیس اسٹیشن کے حدود میں پیش آیا۔

پولیس اور مقامی افرادکے مطابق بالاکرشن نگر میں ایک خاتون سبزی خریدنے کے بعد گھر واپس جا رہی تھی۔

اسی دوران ایک شخص بائیک پر آیا اور خاتون سے سینک پوری جانے کا راستہ پوچھنے کا بہانہ کرتے ہوئے اپنی جیب سے کالی مرچ نکال کر اس کی آنکھوں میں چھڑک دیا اورخاتون کے گلے سے طلائی چین چھیننے کی کوشش کی۔

اسی وقت متاثرہ کا شوہر ٹووہیلر پر وہاں پہنچا جس نے مقامی افراد کی مدد سے اس شخص کو پکڑ لیا جس کے بعد لوگوں نے مل کر اس کی پٹائی کردی۔

ملزم کی شناخت سنتوش کے طورپر کی گئی ہے۔اس کو بعد ازاں پولیس کے حوالے کردیا گیا۔